منتدى الدكتور ياسر عبدالله
مرحباً بكم في منتدى الدكتورياسرعبدالله للتأصيل الإسلامي








منتدى الدكتور ياسر عبدالله

إسلامـــــــي - تربـــــــــوي - تعليـــــــمي - إجتماعــــــي- تكنولوجـــــــي
 
الرئيسيةالبوابةس .و .جبحـثالتسجيلدخول

شاطر | 
 

 أنـت شايــف قلبك عـامل ازاااااى ؟؟؟

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
صفاء أمين
مشرف سابق
مشرف سابق
avatar

عدد المساهمات : 528
تاريخ التسجيل : 19/10/2011
العمر : 25

مُساهمةموضوع: أنـت شايــف قلبك عـامل ازاااااى ؟؟؟   الثلاثاء 7 مايو 2013 - 1:07

السلام عليكم ورحمه اللله وبركاته

انت شايف قلبــــــــــــك عامل ازاى...............


ربنا سبحانه و تعالى عفوه يستغرق الذنوب فكيف رضوانه ؟
رضوانه يستغرق الآمال فكيف حبه ؟
حبه يدهش العقول فكيف وده ؟
وده ينسي ما دونه فكيف لطفه ؟


يُطاع فيشكُر ويُعصى فيغفر ، يُجيب المضطر ويكشف الضر
يسمع كلامي ويرى مكاني ويعلم سري و علانيتي
خيره إلىّ نازل و شري إليه صاعد
هو يتودد إلىّ بالنعم حتى أطيعه وأنا اتمقت إليه بالمعاصي
ياه ياما سترنى ، ياما حلُم عليا ، ياما أنعم علىّ
سيدي و مولاي حبيب قلوبنا

ربنا سبحانه وتعالى هو صاحبي فى شدتى ، هو مؤنسي فى وحدتي ، هو حافظي في نعمتي ، هو وليي فى نفسي ، هو كاشف كربتي ، هو مستمع دعوتي وراحم عبرتي ، ومقيل عثرتي
من أقبل اليه تلقاه من بعيد و من اعرض عنه ناداه من قريب و من ترك شيئا من اجله اعطاه المزيد
ربنا جميل ، ربنا عظيم ، ربنا جليل
عايزين القلب يتحرك القلب يستشعر القلب يهتف مع كل جلسه نجلسها فى رياض حب الله

يهتف يقول أحبك ربي أحبك ربي




النهارده عايزين نناجي ربنا سبحانه و تعالى ونستشفي ببلسم حب الله تبارك وتعالى
كان ذو النون له كلمات جميله أوي بيتودد بها لربنا سبحانه وتعالى فكان يقول " يا رب يا إلهي بأي رجل أمشى إليك "
أجي لك إزاي يارب ؟
" أم بأي عين أنظر إليك أم بأي لسان أناجيك أم بأي يد أدعوك "

أنا ذنوبي ملياني ، أنا مُقر ومعترف إن أنا بعدت عنك كتير وحرمت نفسي منك كتير وعملت أشياء كتير تغضبك عني
بس يا رب أعمل إيه مليش غيرك
ليس لي أحد سواك يغفر ، ليس لي أحد سواك يعفو ، ليس لي أحد سواك ادعوه
أمرتني فعصيتك ونهيتني فارتكبت ولكن حسن ظني فيك وعلمي بك يحملني على الجرأة
جرىء والمفروض إن حمرة الخجل هى اللي دلوقتي تكون عليا و يكون ده حالي بس طمعان
بس نفسى تتوب عليا ونفسي والله أملي عينيا بالنظر لوجهك الكريم
يا رب ما تحرمني من لذه قربك و ما تحرمني من لذة حلاوة حبك وودك
يا رب اجعلها صافية و خالصة من قلوبنا
يارب نكون مش مغرورين نكون بجد مخلصين فى حبك
يارب مليانين آفات ومليانين عيوب والمعاصي بقت ران على قلوبنا وجايين النهاردة نستشفى ببلسم حبك




عايزين نعرف يا ترى قبل كده استشفيت ببلسم حب الله ؟

قبل كده حسيت إن حب ربنا شفاك من حاجة معينة ؟
ابتلاء معين ، من مشكلة معينة وجدت ربنا كان معاك فيها وأنت عارف وأنا أول من يقول الكلام إن إحنا منستحقش بس علشان هو سبحانه وتعالى الجواد الكريم الأكرم

استشعرت أمتى بلسم حب الله ؟

عملنا استبيان وفي ناس قالوا بعض المعاني الجميلة يعني البعض قال
" أنا بحس ببلسم حب ربنا سبحانه وتعالى لما بشوف قلبي متقلب وبشوف قلبي زائغ وسبحان الله ربنا يكرمنى بسماع آيه أو بلحظه صفاء مع ربنا سبحانه و تعالى فيتغير الحال وأحس بأد إيه القلب لما تدخله قطرة حب من حب الله سبحانه وتعالى بتعمل إيه جوه الواحد "

بعض الناس قالت
" أنا حسيت بالمعنى ده قوي كنت في كرب شديد ومرضت مرض شديد جدًا وسبحان الله روحت على الدكتور فلان وعلان ومسبتش لغاية ما قالوا لي الحالة مستعصية جدًا لكن مفقدتش الأمل وكنت عارف إن ربنا سبحانه وتعالى يقول
" أَمَّن يُجِيبُ ٱلْمُضْطَرَّ‌ إِذَا دَعَاهُ "
فدعوته ورجيته واستشعرت أد إيه إنا حاسس بقربه
" وَإِذَا سَأَلَكَ عِبَادِى عَنِّى فَإِنِّى قَرِ‌يبٌ ۖ أُجِيبُ دَعْوَةَ ٱلدَّاعِ إِذَا دَعَانِ ۖ "

يقول " والله ده اللي حصل سبحان الله بعد كده روحت أشوف حالتي لقيت ربنا سبحان وتعالى منّ عليا بالشفاء الدكاترة اللي قالوا الحالة مستعصية ساعتها استشعرت أد إيه بلسم حب الله بيغير حاجات كتير جوانا "




أنا عايز فى البدايه نشوف المرض قبل ما نقول لو ربنا حبنا ولو إحنا حبينا ربنا إيه اللى هيحصل بالنسبة لنا

إزاى هنتداوى من أفاتنا ومشاكلنا ومن عيوبنا ببلسم حب الله
علشان كده فى الأول عايز أتعرف على قلبي وقلبك
يا ترى قلوبنا تتصنف من أنهي صنف ؟
أنتوا عارفين إن النبي صلى الله عليه أخبر بإن الله عز وجل
"إن الله لا ينظر إلى أجسامكم ، ولا إلى صوركم ، ولكن ينظر إلى قلوبكم وأعمالكم "

علشان كده دايما بقول القلوب محل نظر الرحمن و مستودع الإيمان
فلما ربنا هيطّلِع على قلبك دلوقتي حيلقيه عامل إزاى ؟
عايزك تقف لحظة الصدق والصراحة اللى إحنا اتفقنا عليها في البرنامج ده
إحنا قلنا عاوزين نتهيأ قبل ما نسمع الكلام اللى هيتقال فى البرنامج علشان إحنا عايزين لحظه صافية أوى و عايزين نعيش المعاني الحلوة دى بالتهيوء وبالاستعداد

طيب قول لي قلبك من أي نوع ؟ أنت شايف قلبك عامل إزاي ؟

تعالوا نشوف كده النبي صلى الله عليه و سلم والآيات اللى ذكرت أحوال القلوب تعالوا نشوف إحنا حنتصنف من أي صنف ؟
النبي صلى الله عليه وسلم فى الحديث الذى رواه الطبرانى و صححه الالبانى
يقول " انما سمى القلب من تقلبه _اتسمى قلب ليه ؟ عشان بيقلب _ إنما مثل القلب كمثل ريشه في فلاة "
عارف ريشة في الصحراء تحركها الرياح ظهرا لبطن
يعنى إن قلوبنا بتتقلب بسرعة أوى يعنى قلبك سريع التقلب
إيه رايك ؟
يوم فوق و يوم تحت وقت خشوع وخضوع وإحساس ووقت تاني لهو وغفلة و بُعد
قلبك سريع وشديد التقلب ولا قلبك مزوغ ؟
أيوه ما ربنا سبحانه وتعالى لما قال " فَأَمَّا ٱلَّذِينَ فِى قُلُوبِهِمْ زَيْغٌ "
" فَلَمَّا زَاغُوٓا۟ أَزَاغَ ٱللَّهُ قُلُوبَهُمْ ۚ "

زاغ يعني زوغ ، زوغ يعني راح في سكة تانية

فقلبك مزوغ فين ؟


لو قلوبنا زائغة وبعيدة مش هيصلح إنها تتعرف على المعاني الجميلة دي فعايزين نتداوى من مرض الزيغ
ولا أنت قلبك أعوذ بالله مختوم ؟
لما ربنا يقول " إِنَّ ٱلَّذِينَ كَفَرُ‌وا۟ سَوَآءٌ عَلَيْهِمْ ءَأَنذَرْ‌تَهُمْ أَمْ لَمْ تُنذِرْ‌هُمْ لَا يُؤْمِنُونَ * خَتَمَ ٱللَّهُ عَلَىٰ قُلُوبِهِمْ "

قلبه مختوم اتختم عليه اتقفل عليه
أنت عارف قلبك بقى عامل زى اللى متشمع بالشمع الأحمر
مقفول خالص فتسمع الآية ما تحرككش أنت دلوقتي أقول لك الكلام ده تقول عايز أحول بقى هو بيقول إيه ده ؟
القلب مقفول ليه ؟ هو ده القلب المختوم

فيا ترى قلبك من النوعية دى ؟
ولا قلبك مريض ومرضه شديد شوية ؟
اللي النبي صلى الله عليه وسلم شبهه بالوصف النبوي عامل زي
" كالكوز مُجخيا "
يعنى كوز منكوس نحطه فى إناء ماء وبعدين نطلعه تلاقي بيطلع بالعافية كده فيه جاذبية تجاه الماء لكن لما يطلع يطلع فاضي
فالنبي صلى الله عليه وسلم قال " كالكوز مُجخيا لا يعرف معروفًا ولا ينكر منكرًا إلا ما أشرب من هواه "

بتحصل قدامه حاجات فيها انتهاك للحرمات ويقول يا عم الدنيا كلها كده و يؤمر بالطاعات ويقول يا عم فكك الموضوع مش موجب قوي دلوقتي
ما الناس كلها عايشه بالطريقة دي
" لا يعرف معروفًا ولا ينكر منكرًا إلا ما أشرب من هواه "
هواه هو اللى مسيطر عليه قلب مهوي فاضي مليان هوى مليان شهوات
قلبك من النوعية دى ؟
ولا قلبك أعوذ بالله قاسي شديد القسوة ؟
" فَوَيْلٌ لِّلْقَـٰسِيَةِ قُلُوبُهُم مِّن ذِكْرِ‌ ٱللَّهِ ۚ "

يعنى القلب قاسي لدرجه إن الذكر والمعاني اللي المفروض بتطهر أى قلب للأسف الشديد قلب قاسي فمبينتفعش برحمات الله سبحانه وتعالى اللى بتتنزل على الذاكرين
قلبك من هذا النوع ولا من هذا النوع ولا من هذا النوع ؟




العلماء يقسمون القلوب إلى :

1) قلب سليم
" إِلَّا مَنْ أَتَى ٱللَّهَ بِقَلْبٍ سَلِيمٍ "

و القلب السليم ده اللي هو قلبه سليم من كل الآفات القلب اللي عرف يعني إيه رب


2) قلب سقيم
مريض بالأمراض دي من تقلب من تذبذب ، من زيغ ، من قسوه

3) قلب ميت
قلب ميت أعمى للأسف
" فَإِنَّهَا لَا تَعْمَى ٱلْأَبْصَـٰرُ‌ وَلَـٰكِن تَعْمَى ٱلْقُلُوبُ ٱلَّتِى فِى ٱلصُّدُورِ‌"

قلوبنا من أي نوعية ؟
هل أنت تشعر بالذنب ؟
النبي صلى الله عليه وسلم لما حب يبين لما الواحد يختلط عليه الأمور هو ده حلال ولا حرام
فقال " الإثم ما حاك فى صدرك "
قلبك يحس إن فى حاجة غلط ولا للأسف الشديد القلب مش حاسس ؟!


تعالوا النهارده نتداوى من الأمراض دي كلها بقطرة حب ببلسم الحب

لما هيدخل الحب هيعمل إيه ؟
اتصور معايا شكل القلب القلب دلوقتي مقفول القلب دلوقتى عليه ران عليه طبقه سوداء
النبي صلى الله عليه وسلم يقول " ما يذنب عبد إلا ونكتت في قلبه نكتة سوداء "
فعلشان كده عاوزين نشيله بالبلسم ده
أثر الران و أثر القسوة ونفتح الأقفال
" أَفَلَا يَتَدَبَّرُ‌ونَ ٱلْقُرْ‌ءَانَ أَمْ عَلَىٰ قُلُوبٍ أَقْفَالُهَآ "

أنت لو متعت نفسك بآية ، بكلام ربك اللي أنت بتحبه واستشعرت إن ده كلام حبيبك
فلما تحس بالمعنى ده وأنت ماسك المصحف و بتقرأ الآية تنزل الآية لها مفعول السحر على قلبك
تفتح القلب الأقفال اللي حايله بينك وبين ربنا سبحانه وتعالى الأقفال اللي موجوده ، الشمع الأحمر اللي اتكلمنا عليه اللي موجود على القلب يتزاح ببلسم حب الله تبارك و تعالى

تعالى نشوف أثر الحب ونشوف إزاى حنتعاطى جرعة الدواء دي وتنزل قطرة الحب على القلب




ماذا لو حبك الله ؟
ماذا لو ربنا سبحانه وتعالى اصطفاك بمحبته ؟

أول شىء لو حبك ربك وتداويت بالبلسم سيرزقك الإيمان الحقيقي
الإيمان الراسخ الإيمان اللي بيبعث على خشية الرحمن الإيمان اللى يملاك يقين بالله وباليوم الآخر
تلاقى نفسك تهفو للقرب من الله سبحانه و تعالى المعانى تبقى شيء آخر تختلف الأمور بالنسبة لك تماما






كان سيدنا بن مسعود بيقول كده " إن الله يعطي الدنيا لمن يحب ومن لا يحب "
أوعى تفتكر إن فلان اللى ثروته فى البنك كام مليار إن ده اللى بيقول أصل هو إدانى علشان بيحبنى
لا لا لا
سيدنا بن مسعود بيقول " إن الله يعطي الدنيا ويعطي المال من يحب ومن لا يحب و لا يعطي الإيمان إلا من أحب "

إنما الإيمان لا يهبه الله لأحد إلا اللي بيحبه ربنا سبحانه وتعالى فيرزقه الإيمان

فلما تنزل المعاني دي على القلب تخلصه من الآثام و من الأسقام اللى بتحول بينه وبين ربنا سبحانه وتعالى

تانى حاجه لو ربنا أحبك إزاى هتستشفي من الآفات دي ؟
هيحفظك





واحد من الشباب يقولى يا شيخ أعمل إيه الفتن فى كل مكان خلينا واقعيين أنت شايف البنات لابسين إيه
و بعدين خليك واقعي وقولى إزاي اتعامل مع الموضوع الصعب جدا فى عصر الشهوات ده
أنا أقول لك كلمه واحدة " إِنَّ ٱللَّهَ يُدَ‌ٰفِعُ عَنِ ٱلَّذِينَ ءَامَنُوٓا۟ ۗ "
ربنا حيدفع عنك ؟
يدفع عنك إزاي ؟
يحول بينك وبين المعاصي دي يحول بينك وبين الأشياء دي لأنك هتبقى من أولياءه


هذا مصداق قول النبي صلى الله عليه وسلم اللي إحنا تدرسناه عن رب العزه فى الحديث القدسى
" لا يزال العبد يتقرب إلي بالنوافل حتى أحبه فإذا أحببته كنت سمعه الذي يسمع به وبصره الذي يبصر به ويده التي يبطش بها ورجله التي يمشي بها "
فربنا سبحانه و تعالى يحفظه ويبقى فى ولاية الرحمن سبحانه وتعالى

لو حبك هتستشفى بالبلسم فيحفظك و يشملك برحمته

لو حبك سبحانه وتعالى هيعتق رقبتك من النار ولو اعُتقت من النار مش هتقع ولا رجلك هتغرز فى ذنوب ولا في وحل المعاصى




عن أنس قال " مر النبي صلى الله عليه و سلم بأناس من أصحابه وصبي بين ظهراني الطريق فلما رأت أمه الجيش يتحرك خشيت على ابنها أن يوطأ فسعت والهة "
جريت عليه فقالت ابني ، ابني اوعى ابني يحصله حاجه
فاحتملت ابنها ، شالته
فقال القوم يا نبي الله ما كانت هذه لتلقى ابنها النار
بصوا الصحابة والفطنة
بيقولوا طيب اللى بتحب ابنها قوي دي وإحنا عارفين إن ربنا ارحم علينا من آبائنا ومن أمهاتنا
فبيقولوا دي متقدرش ترمي ابنها فى النار اللى بتحبه الحب اللي في غريزة أى أم
إزاى تلقيه في النار ؟
ففطن النبي صلى الله عليه وسلم لمقصود الصحابة فقال النبي صلى الله عليه و سلم
" لا والله لا يلقى الله حبيبه فى النار "
والحديث رواه الحاكم في المستدرك و صححه الالبانى


لو حبك صدقني لا هتشتكي زوغان ولا هتشتكي من قسوة ولا هتبقى عندك المشاكل دي
لو حبك هيعتق رقبتك من النار
لو حبك هيرزقك القبول فى الأرض حينادي المنادي في السماء أن الله أحب فلان فأحبوه فيبسط له الحب ويبسط له القبول فى السماء ويبسط له كذلك لما ينادي المنادي من السماء لأهل الارض أن الله أحب فلان فأحبوه فيبسط له في الأرض القبول
لو حبك هيحفظك من شرور الدنيا

قال النبي صلى الله عليه و سلم " إذا أحب الله عبدًا حماه من الدنيا كما يحمي أحدكم سقيمه الماء "

شفت لو حبك البلسم ده هيبقى له مفعول عامل إزاى ؟




عايزين نتفق عملي

هنعمل إيه النهارده علشان نحس بالمعنى الجميل والحلو ده ونتداوى بحب الرحمن

عايزك النهاردة كده تتأمل معايا الآيه دي لما ربنا وصف سيدنا موسى
عايزك تتأمل الآية دي ياريت تصلي بيها النهاردة
ربنا يقول في سورة طه " وَأَلْقَيْتُ عَلَيْكَ مَحَبَّةً مِّنِّى وَلِتُصْنَعَ عَلَىٰ عَيْنِىٓ "

لما ربنا حبه وألقى عليه المحبه وصنعه على عينه حفظه
البلسم أهو فعلشان كده بعد شويه فى الآيات قال الله عز وجل
" وَٱصْطَنَعْتُكَ لِنَفْسِى "

عايزين نبقى داخلين في المعنى الحلو الجميل ده
ندخله إزاى نشوف سيدنا موسى رد على المعنى ده إزاي
قال " وَعَجِلْتُ إِلَيْكَ رَ‌بِّ لِتَرْ‌ضَىٰ "

عايزك النهاردة تبادر بشىء صدقة بعد الحلقة ، تقرأ جزء قرآن أنت ما كنتش عامل حسابك عليه تبادر بعمل خير
عايزك ترفع سماعه التليفون و تصل رحم تبر بوالد
تعمل شىء يقربك منه و يحقق معنى

" وَعَجِلْتُ إِلَيْكَ رَ‌بِّ لِتَرْ‌ضَىٰ "


يا ترى المعنى جه جواك إيه ؟
يا ترى هتعجل وتبادر بإيه
هو ده اللي عايزك دلوقتي تفكر فيه وتطبقه عملي



سبحانك اللهم ربنا وبحمدك أشهد أن لا إله إلا أنت استغفرك وأتوب إليه
و صلي اللهم وسلم على نبينا محمد وعلى آله وصحبه وسلم

منقول للامانه
الرجوع الى أعلى الصفحة اذهب الى الأسفل
زينب محمد حامد محمد
عضو نشيط
عضو نشيط


عدد المساهمات : 112
تاريخ التسجيل : 26/03/2013

مُساهمةموضوع: رد: أنـت شايــف قلبك عـامل ازاااااى ؟؟؟   الثلاثاء 7 مايو 2013 - 16:36

أكيد فوقتى من الخنقة أستاذة /صفاء ...........أتدرى من يزيل الهم إن طاقت بك الدنيا ............ومن يرعك لا ينساك دوما كيفما تحيا .........فسبحان الذى يهدى .........ويشفى حيرة العبد ويعطى دونما حدى ...جزيل الاجر فى الدنيا ....................
الرجوع الى أعلى الصفحة اذهب الى الأسفل
صفاء أمين
مشرف سابق
مشرف سابق
avatar

عدد المساهمات : 528
تاريخ التسجيل : 19/10/2011
العمر : 25

مُساهمةموضوع: رد: أنـت شايــف قلبك عـامل ازاااااى ؟؟؟   الأربعاء 8 مايو 2013 - 1:24

الحمد لله على كل شىء

جزاكى ربى كل خير اختى زينب
الرجوع الى أعلى الصفحة اذهب الى الأسفل
سامية جمال
مشرف سابق
مشرف سابق
avatar

عدد المساهمات : 902
تاريخ التسجيل : 20/12/2011

مُساهمةموضوع: رد: أنـت شايــف قلبك عـامل ازاااااى ؟؟؟   الأربعاء 8 مايو 2013 - 22:17



يُطاع فيشكُر ويُعصى فيغفر ، يُجيب المضطر ويكشف الضر

يسمع كلامي ويرى مكاني ويعلم سري و علانيتي

خيره إلىّ نازل و شري إليه صاعد

هو يتودد إلىّ بالنعم حتى أطيعه وأنا اتمقت إليه بالمعاصي

ياه ياما سترنى ، ياما حلُم عليا ، ياما أنعم علىّ

سيدي و مولاي حبيب قلوبنا


ايه الكلمات الجميلة دي اختي شيماء

دعوة جميلة

بارك الله فيكِ

الرجوع الى أعلى الصفحة اذهب الى الأسفل
 
أنـت شايــف قلبك عـامل ازاااااى ؟؟؟
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى الدكتور ياسر عبدالله :: قسم الموضوعات والآراء المختلفه :: الموضوعات والآراء المختلفه :: الموضوعات والآراء الثقافية والدينيه-
انتقل الى: