السلام عليكم ورحمة ورحمة الله وبركاته
لقد انتشرت فى الآونة الأخيرة ألفاظ ومصطلحات بين الشباب وهى بحق كلمات روشة طحن
... فنجد الشباب يتفننون فى اختراع هذه الألفاظ ويتفاخر الشاب أمام زملائه بأن كلامه وعباراته
روشة وأنه هو نفسه مروشن ، ولا أدرى إذا كان السبب فى ذلك هو العصر الذى نعيشه أى
عصر الانترنت والتكنولوجيا الحديثة ، أم تقليد الشباب للغرب فى كل شىء حتى فى تسريحة الشعر
....
لأ والشىء الغريب إن الشباب بيطولوا شعرهم والبنات بتقصر شعرها .. ليه مش عارفة ، تبقى
ماشى فى الشارع كده وانت مش عارف البنت من الولد غير لما تشوف طبعا ملابسهم وحتى
فى الملابس بيتشابهوا فى معظمها .... ويا سلام بقى لما تيجى تكلم الواحد منهم أو الواحدة
ماهى مابقتش تفرق وتسأله : ايه أحلامك وبتخطط لإيه لمستقبلك ؟ (على أساس يعنى إنه إنسان
راشد ) ... يرد عليك ويقولك : أنا نفسى أبقى زى تامر حسنى واعمل النيولوك بتاع
شخصيتى زيه .... أما عن الشغل فأنا مابفكرش فى الشغل دلوقتى لأن بابى هو اللى حيظبط
الموضوع ده بعدين ، اما بقى لو كان حد مش من بتوع بابى ودادى والكلام ده فهيقول ادينى
هتخرج وهستنى لما الحكومة تشغلنى على اساس ان الحكومة هتيجى لغاية عنده وتقوله لو
سمحت اشتغل
أما البنت بقى فتقولك / أنا ناوية اعمل عملية تجميل علشان ابقى زى هايفة وهبى .... والشغل
لالالا
شغل ايه ،أنا مابفكرش فى الشغل خالص ليه اشتغل واتعب نفسى وأبوظ جمالى بإرهاق الشغل
، لا طبعا أنا حقعد فى البيت واهتم بجمالى وبس ، هى لو قعدت فى البيت تعمل اسرة سعيدة
ومستقرة يبقى مافيش مشاكل لكن المشكلة انها ممكن تكون سبب ان مايكونش فى حاجة اسمها
اسرة اصلا من اهمالها لاولادها وتربيتهم.
لكن الحق يقال مش كل الشباب كده طبعا ، أنا بس عايزة أوصلّكم إن فى ناس عايشة كده
وخلاص تحصيل حاصل يعنى ، ما تعرفش أى حاجة عن اللى بيحصل حواليها وبجد النوعية
دى هى اللى تصعب علينا . بس للاسف هما مش عايزين يساعدوا نفسهم علشان أحنا نقدر
نساعدهم ، هما بالنسبة لهم حياتهم اللى عايشنها دى هى احلى حياة عندهم ، مش عارفين إن
فى حياة تانية اهم وأحلى من الحياة اللى عايشينها بكتير .
ياسلام لما تحلم وتجتهد علشان تحقق الحلم ده ، شوف فرحتك حتبقى إزاى إنت و شايف حلمك
بيكبر شوية بشوية وخلاص على وشك إنه يتحقق أو اتحقق فعلا
شوف سعادتك حتبقى إزاى لما تصحى الصبح بدرى تروح شغلك إنت مبسوط ، وتتقنه وتراعى
ضميرك فيه زى ماربنا سبحانه وتعالى والمصطفى (صلى الله عليه وسلم) امرونا ... شوف
حتحس بإيه من راحة لضميرك ورضا لنفسك وقناعة لقلبك وعقلك .
وياسلام بقى لما معظم وقتك تشغله بذكر الله حتى وإنت بتشتغل دايما لسانك يكون عامر بذكر
الله وتتذوق حلاوة الإيمان ، بجد أجمل إحساس فى الدنيا (ألا بذكر الله تطمئن القلوب )
إحساس أن ربنا راضى عنك وبيحبك ومن رضاه عنك وحبه فيك بيحبب فيك خلقه ويرزقك من
حيث لا تحتسب .
اخوانى واخواتى تيجوا كل واحد مننا يفكر مع نفسه شوية ، ياترى هو فى أنه جزء ... الجزء
الاول بتوع التيك واى ، ولا الجزء الثانى أحباب الله
أتمنى أن نكون من أصحاب الجزء الثانى
موضوع: شباب التيك واااااى 
الثلاثاء 17 أغسطس 2010 - 7:05
