السلام على من اتبع الهدى
نعم تتوالى الى الآن رحلة الوساطة والتسيب وعدم التنظيم بكلية التربية ، واليكم المهازل التى رأيتها اليوم .
عندما ذهبت اليوم الى الجامعة التى لم أرى فى حياتى مثلها أبدا - وخاصة كلية التربية - ، لكى استلم شهادتى من شئون الطلاب بقاعة مبارك ، وجدت العجب أن الشهادات التى طبعت منذ السبت الى الآن معدودين بأصابع اليد ، والأدهى من ذلك أن أغلبها شهادات الدبلوم الخاص ، وأين العام الله أعلم ، وعندما استفسرت عن شهادتى ، قالوا للأسف لسه مطلعتشى ، طيب ليه : أصل مفيش غير واحدة هى اللى قائمة بالموضوع دة لوحدها بس ، واحدة مسئوله عن استخراج الشهادات جميعها للدبلوم العام والخاص يااااااااحلاوة .
طبعا زى مانتم عارفين ، أنا مباحبش الكلام دة ، وأحب اللى يدى ميعاد يا يكون أده يابلاش ،
مسكتش قعدت على قلبها ، لحد ماخرجت شهادتى اللى مركونة زى غيرها ، طيب وايه اللى خلاها مركونة ، لأنى ملجأتش لواسطة تخلصلى شهادتى وسط الألوف ، ايه اللى عرفنى انى فيه واسطة حتى فالشهادات ،
بالصدفة رأيت فردا ما ، يستلم شهادة أخته - مع العلم انه لسه مقدم ورقها النهاردة - وزعلان ياعينى انه جاى من الصبح فى الكلية علشان استخراج الشهادة من الساعة 8 صباحا ، ومامشيش الا الساعة 1 ، ياحبيبى ، أمال غيرك اللى جاى من محافظات بعيدة ، ومش معاه واسطة فالشئون ، وبيحدفوه ، ويخلوه يتشحطط وييجى يوم تانى ، وياريت كمان صادقين فاليوم ، لا دة راكنين كل حاجة ، والحجة ان واحدة بس ماسكة جميع التخصصات ، وكله ملخبط فبعضه ، مفيش تنظيم كمان ، اللى جه السبت على الأحد على الاتنين كله سلطة ، وانت وحظك ، يالقيت شهادتك طلعت ، يامعلش لسه السنة الجاية ان شاء الله تيجى زى النهاردة تاخدها ، ايه دة أنا بصراحة أشفقت عليها من المتاهات اللى هى فيها ، يعنى الشئون كلها مفيهاش موظفين الا واحدة بس تقوم بالشهادات كلها ،
فعلشان كدة متستعجلوش على الشهادة بالنسبة للناس اللى بتيجى من محافظات بعيدة ، بدل ماتيجوا المشوار على الفاضى ، ولو جيتم عاوز يكون قلبكم جامد ، ومتمشوش الا لما تاخدوا شهادتكم ، وكفانا سكوتا على هذه الفوضى والتسيب .
ملحوظة : قد يظن البعض أننا يجب أن نأخذ نسخة للايصال الذى نستلمة من الخزينة بعد دفع ثمن الشهادة ، وأقول لكم الشئون بياخدوا الوصلين ويدبسوهم فالطلب . فلا تقلقوا ، حقكم محفوظ .
ملحوظة أخرى : مانستلمه هو الشهادة فقط ، أما الملف فله مشوار آخر بعد شهر أو أكثر ، وليس الآن ، مش باقولكم مكتوب علينا الشحططة ، حسبى الله ونعم الوكيل .
موضوع: وتتوالى رحلة الوساطة والتسيب بكلية التربية 
الخميس 7 أكتوبر 2010 - 20:27
