غيران كده ليه =)

غيران كده ليه =)

لا مش اغنيه لمحمد فؤاد .. دى حاجه تانيه .. سمعت قبل كده فى الافلام عن الغيره القاتله !! وتسمع صوت يوسف وهبى يتردد فى الخلفيه : ياللهول !
انا سمعت عنها .. وعشت كام ساعه هلكانه من الضحك بسبب الغيره ..

الغيره هى ان دماغ الواحد تبقى هتتفرك بسبب ان غيره واصل لمستوى هو مش قادر يوصلله .. وبدل ما يفرتك دماغه دى فى انه يحاول يبقى كويس برضو .. لا ازاى يتعب نفسه فى كده .. يتعب نفسه اكتر واكتر فى انه يتطاول على غيره .

أنواع الغيره :

1- غيره شخصيه محموده : ودى اللى بتدفع البنى ادم انه يكون احسن .. وتدفعه انه يطور فى نفسه واخلاقه وامكانياته ..

2- وغيره شخصيه مذمومه : ودى اللى مالهاش اى لازمه لصاحبها .. مش بتخليه يعمل اى حاجه غير انه يحقد على الاخرين ويفكر في انهم لازم يكونو اقل منهم .. يعنى بدل ما يفكر فى تحسين نفسه .. لا يفكر فى الاساءه للاخرين


3- غيره عاطفيه : ودى نوع من الغيره على الشخص مش من الشخص .. بتغير على حبيبك .. حبيبتك .. خطيبتك مراتك ودى نوع من الغيره المطلوبه فى حدود .. لو زادت او قلت .. هتكون مش فى مصلحتك ولا مصلحه الطرف الاخر .. وهنتناول ده فى مواضيع اخرى 


أسباب الغيرة :

1- معندوش ثقه كافيه فى نفسه :
وده بيكون نوع خفيف من الغيره .. ممكن يكون اللى غيران ده عنده حاجات كتير اوى كويسه .. بس على الرغم من كده بيغير .. والنوع ده بينتهى بمجرد ما الغيران يسمعله كلمتين كويسين من حد .. فثقته بنفسه تزيد .. ويبتدى يخلص من غيرته من الشخص الاخر

2- انسان فاشل اصلا :
وده بقى مالوش حل .. يعني غيران ويعينى مفيش امل انه ممكن حد يسمعه كلمتين حلوين زى النوع اللى قبله .. ده بسبب فشله والنوع ده صعب يخف ابدا .. لما يبقى يخف من الفشل .. يبقى يخف من الغيره =)

3- محدش بيحب حد احسن منه:
طول عمر والدتى بتقولى الكلمه دى .. محدش بيحب حد احسن منه الا الاب والام .. بيحبو ولادهم يبقو احسن من الدنيا كلها .. فطبيعى اوى ان لما يبقى حد نفسيته ضعيفه ويفاجأ بشخص اخر يطلع وهو فى نفس مكانه .. وينجح .. والغيور فى نفس مكانه .. ويتفوق .. والغيور فى نفس مكانه ... ودول بقى اللى بنسميهم اعداء النجاح .. كل ما حد ينجح بيكونوا هيتجننوا عشان يخلوه يفشل .. ومايتفوقش عليهم ابدا .. مش عارفين ان ده نصيب من ربنا .. او توفيق ورضا من رب العباد على الشخص الناجح

تعمل ايه مع الشخص الغيرااان منك جداا ؟
تعامل معه كما قال الشاعر :
واصبر على كيد الحسود فان صبرك قاتله :: النار تأكل بعضها ان لم تجد ما تأكله
اتركه لينعم بنيران حقده وغيرته .. واستمتع انت بنجاحك الذى تستحق

الخلاصه :
الغيره مش امر وحش لو كان بيدفع البنى ادم انه يكون احسن ..
انما لو فضلنا مشغولين بغيرتنا وبس .. ومش بنحاول نتقدم ولا بنحاول نغير من نفسنا عشان نكون احسن من الشخص اللى بنغير منه .. هنفضل فى مكاننا علطول .. وهنفضل فى حاله الغيره المستمره الى مالا نهايه دى