مش بالساهل تاخدنى

مش بالساهل كده هتاخدنى
لازم من نفسى تخطفنى
لازم بكلامك تسحرنى
شخصك ورجولتك تأسرنى.

لازم. ..
لازم أسهر بيك مشغولة
و لا لحظة انساك كده بسهولة
و أشوفك حاجة مش معقولة
واحد غير كل اللى قابلنى.

لازم.....
لازم أفضل ليك مشدودة
و ابقى بوجودك موجودة
و مشاعرى ليك مش محدودة
حاجة أكبر منى بتدفعنى.

لازم. ..
لازم تتعذب فى فراقك
توصف ليّا نار أشواقك
تنادينى صباحك ومسائك
على بابى دايماً مستنى.

لازم. ...
لازم ادوق عطفك وحنانك
و تورينى بردو جنانك
تزرعنى وردة ف بستانك
و ايديك تحضنى وتقطفنى.

يمكن علشان أنا أمورة
عايزة حبيبى يملا الصورة
إوعى لتحسبنى مغرورة
أنا طيبة أوى لو تعرفنى.