دوما كان اصحابي يقولولي هو انت ضمير مش واجعك عشان مش بتذاكري ... كنت اشعر بدهشه من كلامهم وأقول في نفسي ايه علاقة المذاكره بالضمير !!!
وعندما كانت تأتي الإمتحانات فجأه و اشعربالخطر والخوف من الرسوب والفشل .. اذهب بسرعه إلى ضميري لإيقاظه قائله : اصحى يا ضميري الإمتحانات جات
فيرد ضميري قائلا : انت جايا دلوقتي تصحيني ليه مصحتينيش مالأول يا اذكى اخواتك ؟!
اقول له في خجل : اصحى بقى يا عم خلاص مفيش وقت
فيصحى ضميري مغلوب على امره ... وعندما يجد حجم الكتاب وما فيه من الصعاب ويشعر بالعذاب يبدأ في تأنيبي قائلا : ليه يا بنت الناس سبتيني نايم كل الفتره دي ليه مصحتنيش مالأول عشان نذاكر يا جزمه ...
ارد قائله : اعملك أيه أهو دا إللي حصل وكفاية بقى يا ضميري تأنيب انا مش ناقصه ...
يرد ضميري : وكمان مش عاجبك يا هانم طب خلاص انا مليش دعوه بيكي خالص سبيني انااام
اقوله : خلاص بقى ياضميري انا اعمل ايه ؟
يقول : طب خلاص ياللا عشان نذاكر وياريت المره الجايه تصحيني بدري انت فاهمه
اقوله خلاص حرمت هاصحيك ع طول
بس انا بضحك عليه وبسيبه ينام كل مره واصحيه في الآخر