استغربت ما رايت بالامس

السلام عليكم ورحمة الله وبركاته

استغربت ما رايت بالامس يا اخوانى فى شوارع محافظة قنا زحام شديد جدا جدا
عند احدى المكتبات لدرجة اننى اعتقدت انها مخبز وعندما سالت عرفت انه يتم تهريب ملخصات
ما معنى ذلك يا اخوانى انا لا افهم بالمره لماذا يمنع بيع الملخصات هل بها شئ خاطئ ام هناك سبب
اخر وما الخطأ فى الملخص طالما هو شئ يساعد الطالب ؟
والاغرب اننى عرفت اسماء مكتبات لها اسمائها تم اغلاقها وحبس وكلام غير مفهوم واذا كان الامر
للاعتماد على الكتاب المدرسى فماذا اذا عن الدروس الخصوصيه وكيف سيتم وقفها؟؟؟

وما احزننى عندما سمعت احد اصحاب المكتبات يقول(حسبى الله ونعم الوكيل وقفوا حالنا)

فماذا يحدث يا اخوانى هل لديكم تفسير؟؟؟؟؟؟؟؟؟
ارجوا ان نناقش ما يحدث من حولنا لعل الله ان ييسر امر هذه الامه ويفرج كربها وان يصلح ولاة امورنا

وصلى اللهم على الحبيب المصطفى وعلى اله وصحبه وسلم

السلام عليكم ورحمة الله وبركاته

ماتزعليش ياسارة إحنا محتاجينك وماتتكلميش تاني في السياسة

أصل إنتي ماتعرفيش الدولة إكتشفت إن الملخصات بتساعد الطلبة

على النجاح بتفوق وبعدين يجيبوا مجموع مرتفع ويدخلوا كليات القمة

والعيال مخهم يفتح وينور وطبعا الحكومة مش عاوزة كده عاوزين

شعب أهبل وعبيط مايعرفش حتى يقرأ الجرائد علشان مايطلبش منهم

وظائف ولايعرف مؤامرتهم على نهب الشعب وكمان إكتشفوا إن هذه

الملخصات نوع من أنواع المخدرات يجب مكافحته والقضاء عليه

وعليكم السلام ورحمة الله وبركاته
هههههههه
دائما تعليقاتك جميله يا استاذى
بس انا بنت يعنى فى امان
اما حضرتك بعد الكلمتين دول ربنا يستر
وتقول منك لله يا ساره
بس تفسير حضرتك مقنع جدا ودى خطة الاصلاح الجديده للبلد وما خفى كان اعظم
والله لو حال البلد ديت ممكن يتصلح لو اتكلمنا فى السياسه او اتحبسنا حتى مكانش حد سكت
دا حال الناس بقا يصعب على الكافر
وحسبى الله ونعم الوكيل

السلام عليكم ورحمة الله وبركاته

اكيد ياسارة ان شاء الله هيكون فى حل لكل اللى بيحصل حوالينا ... سواء

عاجلا ام اجلا ....

ازيك ياساره انت كده ححتقلينى عليكى
الاستاذ خالد قال سياسه اصلاح
اصلاح ايه بس

يعنى انا سمعت انى فى ضرايب ححتفرض على دار النشر بالملايين والدار النشر ررفضت فى ده اللى ححصل بتباع فى السوق السودة دلوقتى
ويبقى ايه ياساره انت اكيد اكيد فين.................
وربنا يصلح الحال ويهدى

اهلا يا غاده انا الحمد لله يا حبيبتى
والله احزننى جدا كلامك
وانا اكيدطبعا فى مصر Sad

وعليكم السلام ورحمة الله وبركاته
موضوع رائع فالمسلم من يهتم لأمر المسلمين
وحقا هناك من الأمور تحدث تجعلنا نقول الستر يارب علينا مما وصل ليه حال الأمة .
وعموما خلينا نحسن الظن بيهم يمكن قصدهم الإصلاح وإني الملخصات بتشتت التلاميذ وبتخليهم مهملين للكتاب المدرسي الذي أصبح ملئ بالأخطاء التي لم تصحح منذ سنين , وإنهم يبغون التطوير في التعليم نستنا لما نشوف الغرض الأساسي يمكن

نحسن الظن بمين اكيد انتى مش بتمسكى كتاب الوزارة شوفى كتب الرياضة لو

عرفتى تحلى حاجه

مكتوب مثال واحد وعشرات الاسئلة المهم الاعتماد كله على المدرس والمشكلة لو

المدرس اخذ اجازة طبعا Question

السلام عليكم ورحمة الله وبركاته
أختي وفاء
مع الأسف أطلعت عليه بس يمكن أنتِ لم تلاحظي إني المقررات دي تنفع مع طلاب نفس العمر لكن ذوي المستويات العاليه في التفكير وهم عاوزين يخلوا ولادنا زي الناس دي بس مع الأسف هم بيدمروهم
الله المستعان علي ما يحدث

السلام عليكم ورحمه الله
ازيك ساره واستاذ خالد وغاده وهبه
ايه ده انت كده عايزين حد يجيب ليكم عيشه وحلاوه
بس بجد معاكم حق حتى الملخصات
طيب يطور المناهج ويمنوعها
ولا يلا جات على دى وتتعدل
ربنا يصلح الحال ويهدى وشكلى كده حروح معاكم
وادى الحلاوه وحد يجيب عيش معاه هو داخل

[ندعوك للتسجيل في المنتدى أو التعريف بنفسك لمعاينة هذه الصورة]

وعليكم السلام ورحمة الله وبركاته
يسلملى مروركم هبه وفاء وهيام
والله انتى طيبه يا هبه وربنا حيكرمك اخر كرم ان شاء الله
وفاء طبعا كلامك صحيح وهذا لفت انتباهى فعلا فى كتب الوزاره
ومتخافيش يا هيام اجبلك معايا احلى عيش انتى تؤمرى حبيبتى
دا انتى سريعه يا هيام مش تستنى لما نجهز واجهز العيش

يا اخواننا ياريت متسمعوش رأى واحد او طرف واحد ياريت تسمعوا وجهة نظر الوزير علشان تحكموا صح
وبصراحة انا اقتنعت بكلامه لان حال التعليم عندنا عايز ثورة وتمرد على الاوضاع الحالية علشان تنصلح الاحوال

السلام عليكم ورحمة الله وبركاته

تؤكد وزارة التربية علي انها تتابع قرارها بالمنع وتري ان وراء الملخصات غايات تجارية ولها

سلبية ابرزها ان الطالب يعتاد علي الحفظ والبصم بدلا من الفهم والاستعاب .

عندما لايفهم الطالب المدرس وعندما لا يعطي المدرس الدرس حقه لابد للطالب الاستعانه

بالملخصات وهل المدرس قادر علي تغطية المناهج بالكامل وحل لكافة التمارين عندما يكون كل
ذلك محققا عندها استغني الطالب عن الملخص

كل يوم يستيقظ علي قرارات جديدة للتربية والتعليم وما خفي كان اعظم

السلااااااام عليكم جميعا

انا جيت متأخرة يمكن بس معلش لي رأى مخالف بعض الشئ على فكرة انا شايفة ان الناس بتقول ان الملخصات بضر الطلبة لانهم بينقلو الحلول او بيحفظو طيب هو اصلا المنهج طلب فهم ولا تنمية قدرات والطلبة معملوش لا لان اصلا المنهج منهج هابط لا يقوم الا على الحفظ ومافيهوش اى مقومات لتنمية ذكاء الطالب اما عن الملخصات انا سمعت ياسارة ان الملخصات هتنزل يوم 20 او 23 فى الشهر عشان حضرتك سعرها ارتفع ومش الوزير اللى منعها لانى كمااااااان سمعت كارثة بتقول ان الوزير باع المنهج الحديث للناس اللى بتطبعاملخصات بسعر عااااااالى خاااااااالص عشان ياخد نسبة ويستغلها فى ادخال بعض التطويرات على الوزارة او شئ من هذا القبيل يعنى
المهم ياساده أيا كان هذا ولا ذاك اننا بنأزن فى مالطة محدش هيسمعنا وكدا كدا خربانه ............. والسلام ختام ......... فوتكم بعافية

السلام عليكم ورحمه الله وبركاته
ايه داليا فينك
عامله ايه وايه ياساره احنا كلنا كده مش عايزين عيش وبس احنا عايزين فرن يدوب
ههههههههههههههههههههههههههههههههههههههه
استاذ محمد بيقول ياريت من سماعش الكلام من طرف واحد طيب انا عايزه اعرف ايه
هدف اوزير من كده يعنى هى الناس ناقصه مشاكل
كفايه المشاكل اللى عندهم تتطلع مشكله الملخصات وعلى فكره ده مش حل بكده الدروس حزيد والملازم واسعار بيعها
وبصراحه
انا عن نفسى بستفاد منها الملخصات واسئلتها وطريقه عرض الماده
وبعدين ياريت يكون الهدف التطوير احنا نكره
ربنا يصلح الحال ويهدى وكفايه كده
سلام

السلام عليكم ورجمه الله وبركاته
انا ياساره كنت داخله ومعايا غيش بس فعلا كده شكله مش حيكفى
الموضوع سخن وهو فعلا موضوع مهم ومحتاجين نفهم ولا يلا
ياجماعه بجد خلاص يعنى هيه جات على دى يلا
ربنا يهدى ويقوينا ويعينا على اللى احنا فيه

السلام عليكم ورحمة الله وبركاته
اسفه اخوانى على التاخير
بارك الله فيكم اخوانى على المشاركه برايكم
اولا شكرا استاذ محمد وحضرتك عندك حق فعلا التعليم عايز ثوره بس ثورة اصلاح لكن الملخصات يعنى هى اللى معطله حركة الاصلاح يعنى احنا عاملين زى اللى بنسيب الاصل ونمسك فى الفروع
ومتنسوش انى الملخصات بتساعد طلبه كتير مش بتاخد دروس وبتعتمد عليها عند تقصير المعلم

ثانيا شكرا يا اميره بس مين قلهم انى الملخصات بتشجع على الحفظ والصم وبعدين حتى لوكانت كدا فعلا ما احنا نظام تعليمنا اصلا قائم على الحفظ علشان ناخد الشهاده وندخل كلية قمه ونشرف اهلنا ونلقى وظيفه كويسه الى اخره لا اكتر ولا اقل ولا هما بيضحكوا على نفسهم

ثالثا اهلا داليا دايما كدا متاخره Question

بس مش مشكله
انا سمعت برضوا يا دالياالى قلتيهبس قلت يمكن اشاعات ومحبيتش اسئ الظن والله اعى واعلم ولوكان الامر كدا فعلا يبقا ربنا يستى من اللى جاى

اهلا غاده انا بخير انتى ايه اخبارك
ويا غاده قضيها صوم مش لازم تاكلى دا حتى الصيام صحه :D
ايوه فعلا الدروس حتزيد خالص وربنا يستر

ومعلش يا هيام مش محتاجين عيش تانى اصلى خلاص غاده حتصوم فحتوفر كتير يعنى جبيلنا احنا بس
وعلى رايك ربنا يصلح حالنا جميعا
[ندعوك للتسجيل في المنتدى أو التعريف بنفسك لمعاينة هذه الصورة]

سلااااااام عليكم جميعا

اخر ما توصلت اليه ياجماعه فى موضوع الكتب ده ان الوزير فارض مبلغ كبييييير اوى على مؤسسات طبع ونشر الملخصات اللى زى الاضواء وسلاح التلميذ وكراسة الاول وكده يعنى وعارفيييين المبلغ كام 45.000000
فى عين العدو خمسة واربعين مليوووووون جنية يابشر ليهم حق ماينزلوش ملخصات وتولع الطلبة وان شاالله ما حد ذاكر ولا اتعلم ما احنا دولة شهادات صحيح... كده شكلكم هتجيبولى انا بس العيش والحلاوة ههههههههههههه معلش ممكن كمان تجيبولى شيبسى بالمرة معاكم

وسلام مربع للتعليم فى مصر cheers

اه صحيح نسيت ازيك ياسارة انتى وغاده وهيام واميرة وهبة الله والمستر الكبيييييييير وسلام كبير اوى للكل ومعلش بقى بتاخر فى دخول المنتدى والردود اعذرونى............. فوتكم بعافية

الله يا عافيك داليا
هههههههههههههههههههههه
وبعدين انا برضه سمعت عن المبلغ بس هو 50 مليون المهم 45 او50 المشكله فى النهايه واحد واللى بيضع اكيد الطالب
ولسه مشكلات التعليم مستمره وحتسمر
طالما هوده الحل
ربنا يهدى ويصلح الحال

السلام عليكم ورحمة الله وبركاته
ازيك يا داليا انتى وغاده
اخبارك كلها تفرح يا داليا الله يعطيكى العافيه
شايفه يا غاده وكمان عايزه شيبسى
الشيبسى اصلا حيمنعوا يا ماما انتى لسه معرفتيش
اللهم انى لا اسئلك رد القضاء ولكنى ااسئلك اللطف فيه

على فكرة ياسارة جبتلك خبر طاااااازة جديد المبلغ المطلوب لوزارة التربية والتعليم من مؤسسات النشر والطباعه الى هى بتطبع الملخصات يعنى يتراوح مابين ال200.000 وال مليون واربعين الف لالالالا احنا ظلمناهم ياجماعه وقولنا اربعين وخمسة واربعين وخمسين مليون لالا حرام ظلمتو احمد زكى بدر ده سكرة ده ملاك المهم ياساده ياكرام ومايحلى الكلام الا بذكر النبى عليه الصلاة والسلام المؤسسات رفعت قضية عالوزير وشكلهم كده كسبوها او على وشك المكسب يعنى لان الملخصات بدأت تتدواول بين الطلبة بس بينى وبينكم فى السر اصلى اللى معاه مخلص دلوقتى بيتمسك ويتحبس ........... وربنا يحفظنا ويحفظكو

السلام عليكم ورحمة الله وبركاته
ربنا يستر عليكى يا داليا
لا حول ولا قوة الا بالله
انا كنت فاكره انها امنتعت لمصلحة الطلبه
معقوله المبلغ ده
انا نفسى اقعد مع وزير التربيه والتعليم ده شويه فى كلام كتير نفسى اقوله ليه
حتى لو كان ده حيكون اخر مشوارى فى التربيه والتعليم
بس ابقى قلت اللى فى نفسى
عموما ننتظر اخبارك حبيبتى داليا
وياريت توافينا باخر الاخبار
وربنا يصلح احوالنا جميعا

السلام عليكم ورحمة الله وبركاته
داليا -- سارة / أنا ملاحظ إنكم بتتكلم في موضوع المُلخصات كثيراً لدرجة
إني شكيت إنكم بتاجروا في الملخصات --- شوفوا ياجماعة الواضح إنكم مش
مستوعبين الموضوع كويس -- أولاً- الدكتور أحمد زكي بدر أول ماجاء الوزارة
أنا كنت مغموم وزعلان بسبب كرهي لوالده وزير الداخلية السابق ولكن والله وحتى
الآن أثبت الرجل إنه أحسن وزيرتربية وتعليم بل احسن وزير حالياً في مصر

*بالنسبة لموضوع الملخصات فيه لجنة بتتشكل من خبراء التعليم لوضع وتصميم
كتاب الوزارة ومكافأتهم بالملايين من ميزانية الوزارة التي من المفروض
إنفاقها على المدارس والعملية التعليمية والأنشطة هذا ماكان يحدث في السنوات
السابقة --- وهذا العام إكتشف هذا الرجل المحترم وزير التربية والتعليم أن
البشوات معدومي الضمير الذين يضعون مناهج وكتاب الوزارة هم أنفسهم شركاء
ومصصممون للكتاب الخارجي يعني يجعلون قيمة كتاب الوزارة سيء للترويج
لسلعتهم الخارجية ولذلك قام الرجل بهذه الثورة التنظيفية أولاً لكي يحصل الناشر
على ترخيص من الوزارة أولاً وتسديد بعض الرسوم وبالفعل بعض الناشرين
إستاجبوا وكتبهم قريباً في الأسواق -- أما بالنسبة للمبلغ المحصل من الرسوم
التي يسددها كل ناشر لن يضعها الوزير في جيبه ولكن سوف ينفقها الوزير على
اللجنة التي سوف تضع المناهج وتصمم الكتاب المدرسي وبذلك يبتعد عن
الميزانية المخصصة للوزارة وجعلها بالكامل لخدمة المدرسة وبناء مدارس
جديدة وهكذا -- أرجو تكون المعلومة وصلت حتى لانظلم أحد

السلام عليكم ورحمة الله وبركاته

أستاذى وأخى العظيم خالد ، لى تعليق عليك ، ان ضرر هذا كله ينصب على الطالب ، لأن أغلب المناهج كماهى بلا تعديل ، وان كانت هذه نية الوزير فلماذا لم يغير أغلب المناهج ، طالما لغى الكتب الخارجية ، ماكدة كدة الطالب بيدرس فنفس الكتاب اللى عمله مؤلف الكتاب الخارجى ، وطبعا احنا عارفين الكتاب المدرسى القديم عامل ازاى .

وللأسف لما غير غير للأسوأ ، ازاى

أول شئ ككونى معلم بمدرسة تعليم فنى صناعى رأيت أن هناك بعض المناهج قد تغيرت ، وعندما قاموا بتغيير المناهج لم يوفروا الكتب ، وأحضروا بدلا منها اسطوانة واحدة مع الموجة العام لبعض المواد ، وكل مدرس فمدرسة يروح المديرية ياخد الاسطوانة اللى مفيش غيرها ، ويطلب منه الموجة أن ينسخها ويعيدها مرة أخرى - ده كلام - ، طيب يعنى الأسطوانة مفيهاش أى تكلفة ، وبرخص التراب ، ليه مش عاملين اسطوانات كتيرة ويبعتوها للمدرسين فالمدارس ،

وسيبك من أن المدرس يطبعها على حسابه ، أغلب المدارس بها كمبيوترات ، وممكن المدرس يجيب ورق وتطبعله المدرسه فالورق اللى هيجيبه ، أو ممكن توفرله الورق والطباعة ، الأدهى بقى ان الطالب مطلوب منه مصاريف المدرسة الى غير انه يقوم بتصوير هذا الورق ، ايه الاستغلال دة ، وممكن المدرسة تصور الورق للطالب وتاخد منه فلوس بزيادة واحنا عارفين كدة ،

ثانى شئ بالنسبة لأنى أدرس منهج اللغة العربية والتربية الدينية الاسلامية للصف الأول الثانوى الفنى ، أحمد الله ان كتاب اللغة العربية زى ماهو ،

بس اتصدمت لما لقيت فالتربية الدينية الاسلامية ان المنهج هو منهج الثانوية العامة لجميع المراحل يعنى أولى صنايع بتاخد منهج اولى ثانوى عام وهكذا ، ولو قارنت بين المنهجين هتلاقى ان منهج التعليم الفنى السابق كان أفضل بكثير من المنهج الجديد الذى يدرسه طالب الثانوى العام ، لكونه يلم الكثير من الأمور الدينية التى تنفع المسلم فى حياته ، كالطهارة والوضوء والغسل والصلاة الى غير ذلك ،
أما الآن رأيت منهج صغير جدا لو أردت أن أخلصه فى أسبوع لكفى وزاد .

اللى عجبنى فيه بس الكتاب الاضافى : معجزة القرآن للشعراوى .

وأحمد لله أننى أيضا لم أختار أن أدرس للدبلوم هذا العام ، لكون المدرسين والأنقح من ذلك الموجهين لا يعلموا شيئا عن مصير الكتب موجودة أم لا - مع العلم أن منهج الدبلوم كله جديد هذا العام - ، وهل توجد له اسطوانه كباقى المواد أم لا ، الله أعلم .

مشكلة أخرى : مشكلة تنظيم مناهج الشهور يا أستاذى التى كانت محددة فالاعوام السابقة سبتمبر واكتوبر ونوفمبر وهكذا ، رأيت هذا العام منهجا غريبا ، مجرد ان المحترم اللى كاتب المنهج كاتب الفهرس ، وانت قسمها مع نفسك ، يعنى سلطة .

والأدهى من كدة ان منهج الدبلوم بهذا الوضع ، وفي مادة النصوص هناك من المعروف أبياتا تحفظ من بعض النصوص ، لا هو قايلك 80 بيتا طيب فين ال 80 بيت دول اللى هاخلى الطالب يحفظهم ، ايه انقى بمزاجى ، طيب دة ممكن لو فالنقل لأن احنا اللى بنعمل الامتحانات ، لكن فالشهادة كمان عايمة ، والباشاوات هما اللى هيعملوا الامتحان وممكن ييجى سؤال أكمل والطالب ممكن ميكونشى حفظ النص اللى الباشا جايبة فالامتحان ، لأنه فالأساس محددشى للطالب يحفظ من قول الشاعر كذا الى قوله كذا فى نص كذا .

ان التخطيط لاصلاح التعليم لا يتم بهذا الشكل ، دون أى حساب للعواقب ، ان كنت تنوى الاصلاح مهد لذلك ، ولكن لاتفعل ذلك فجأة ، والمكان الذى تريد فيه الاصلاح ليس مؤهلا لذلك ، عندما تلغى الكتب الخارجية الغى المناهج القديمة المبهمة ، واطبع بدلا منها مناهج أخرى بمواصفات خاصة جيدة ، مع توفير الكتب للطلاب .

لأن الأهم فى ذلك كله هى مصلحة الطالب ، وليس التجنى عليه ، وظلمه .

السلام عليكم ورحمة الله وبركاته
ياأحمد أنا مُش بدافع عن الوزيرلأنه قريب لي فأنا لاأعرفه ولايعرفني ولاأنا تابع
للحزب الحاكم ولاهكون --أنا بقول كلمة حق ليست من النت ولاصفحات الجرائد
إنها من مصادر مهمة عندما كنت مسافر ومع العلم هذه المصادر من معارضي
الحكومة إلي معروفين بحري ولهم وزنهم
المهم أنت لم تقرأ تعليقي جيداً / الوزير لايقوم بتغيير مناهج ولكن فيه لجان
من خبراء التعليم في مصر ومثلما قولت في تعليقي إن الوزير إكتشف بنفسه
وبتحرياته الخاصة إن الناس دي هم الذين يضعون المادة العلمية في الكتاب
الخارجي فلماذا لم يضعوها في الكتاب المدرسي وإتضح إن العملية مقصودة
منهم لرواج الكتاب الخارجي وقتل الكتاب المدرسي ولكن بعد أن تم توزيع
الكتب للمديريات بل للمدارس هذه القصة والوزير ده طهر الوزارة من لصوص
كثيرة جداً ورجع أموال للمدارس كانت منهوبة من سنين وأنا مدرستي إستلمت
دفعة من هذه الأموال وهكذا وأدعو الله إنه ينزل قنا وينظف مديريتها وإدارتها

السلام عليكم ورحمة الله وبركاته
جزاك الله خيرا يا استاذ خالد واستاذ احمد
على توضيحكم
وايه المشكله بس يا استاذنا لما نتاجر فى الملخصات وبعدين صدقنى حضرتك انا اصلا
معرفش ايه الموضوع على حقيقته انا سالت
وكل من يعرف معلومه طرحها
بس انا نفسى اعرف ازاى احمد زكى افضل وزير
من ناحية ايه يعنى انا مش فاهمه حضرتك دا الناس كلها بتشتكى منه اما بسبب الدبلومه
او الاى سى دى ال او غيره
والله اعلم مين اللى على حق طيب اذا كنت انا
مشتغلتش لغاية دلوفتى ومبكدبش على حضرتك انا بكرهه علشان
كدا يعنى ايه مش حياخدو الخريجين الجدد
حياخدوا من السنين اللى فاتت امال احنا نروح فين لازم نستنى لما نقدم ونبقا من زمان ولا ايه
اما موضوع الملخصات دوت انا صدقت ما قيل
انه الوزير فرض ضائب وطلب نسبه وما الى ذلك لانى فى اكتر من حد وحتى فى التليفزيون
قالو كدا والله اعلى واعلم
وبشكر حضرتك والاستاذ احمد على التوضيح
وربنا ييسر الامور ان شاء الله

وعليكم السلام ورحمة الله وبركاته

الأختلاف فى الراى يا أستاذى لا يفسد للود قضية ، أنت تنظر للوزير من ناحية وأنا انظر اليه من ناحية أخرى ، ما يغيب عنك يا أستاذى أن مايفعلة أحمد زكى بدر ليس الا ارضاء للسلطة ، واثباتا لهم انه على قدر المسئولية ، يعنى بمعنى أصح مش هييجى يقول عاوز ميزانية للتعليم ، لا دة عاوز يطبق نظام من لحمه وفتله ، طيب أنا معاه فالموضوع دة ماشى ، طيب الطالب مفكرتش فيه ليه ، للأسف الأستاذ مفكرشى فالطالب فكر فصورته أمام الرئيس فقط ، والأدلة على ذلك كثيرة :

منع الملخصات التى يحتاجها الطالب ، ماشى ، امنع بس فين البديل ، ماهو ادامك حل من اتنين ياتغير المنهج القديم وتبدلة بآخر يفوق أى ملخص ، ومش لما تيجى تغير متوفرشى كتب دى مصيبة وكارثة .

يا اما مش قادر على تغيير المناهج متمنعشى الى أن توفر كتب أخرى بديلة ، مش تخللى الطالب يتداس بينك وبين اللى معاديهم .
وتضطره أن يقع فريسة لأصحاب الدروس الخصوصية ، بأن يعمل المدرس ملخصات وطبعا دة ليه سعر تانى غير سعر الدرس ،

الناس تجيب منين لكل دة ، تشحت ، يعنى تدفع مصاريف مدارس ، الى غير لما الباشا غير مناهج معملشى كتب وخللى الطلبة تصور من المدرسين ورق الاسطوانة ، الى غير الدروس الخصوصية ، الى غير اسعار الملازم.

سيبك من دة ندخل فموضوع تانى

معلومة لسه طازة من قرارات الوزير ، بتقول ايه المعلومة دى

وقف تعيين مدرسى الأجر بالتعاقد المميز ، مع منع التعيين بالأجر مرة أخرى ، والاعتماد على مدرسى المدارس المعينين والمتعاقدين مع رفع نصابهم .

ده كلام ايه الافترا دة والناس اللى اشتغلت واللى لسه عاوزة تشتغل يعملوا ايه يشحتوا دة وقف حالهم كدة ، حرام والا حلال ، والا علشان يوفر الفلوس ، ويثبت للرئيس انه حكمها ، وانه مش هيطلب ميزانية من الباشا التانى وزير الماليه ، طيب والتوفير دة لصالح مين ، طبعا كلناعارفين انه وفر موفرشى سواء هو أو غيره الوضع بالنسبة لنا زى ماهو مفيش تغيير كل يوم فى غلاء وعيشة مرار ، يعنى التوفير مش لصالح الشعب ، ولكن لصالح أناس آخرين كلنا نعلمهم .

السنة دى منع تعيين ناس جديدة بالأجر واعتمد على القدامى فقط ، هنقول مفيش عجز ، هاقولك لا فيه عجز ، بس الباشا عمل ايه ، بعت اشارات للمدارس بان العجز يتقسم على المدرسين بالمدرسة ، ويتحاسبوا على الزيادة دى بالأجر ، حرام دة والا حلال ، طيب مين الأولى الناس الجديدة اللى عاوزة تشتغل وتلاقى لقمة عيش والا اللى انت معينه ومثبته .

أنا يا أستاذى بابص للأمور من جميع النواحى ، وبافكر فيها بتأنى ، وعلى فكرة المواضيع دى شغلت بالى كتير ، لانى لا يهمنى نفسى فقط ، ولكن يهمنى غيرى أيضا ، لأننى كنت فى يوم من الأيام مكانهم وأعانى مثلهم فحرام والله العظيم حرااااااام.

السلام عليكم ورحمة الله وبركاته
شوفي ياسارة هذا الراجل مكروه من أعداء النجاح -- شوفتي عادل لبيب كان بيعمل إيه في قنا وحولها من مستنقع زباله لمدينه من أجمل مدن مصر وكانت فيه فئات محددة ومعروفه بتكرهه وعلى رأسهم أعضاء مجلس الشعب والشورى لأنه لم يكن يقبل وساطات من أحد ------
والدكتور أحمدزكي بدر منذ وصوله مسك حرامية كتير حيتان في الوزارة وفي الكنترولات وخاصة الثانوية العامة وإستطاع محاربتهم والقضاء عليهم وهم أكثر من يحاربوه الآن ----
أما شهادة الدبلومة التربوية وشهادة icdl ليس للرجل أي دخل فيها لأنها موجودة في قانون التعليم الجديد لسنة 2007 الخاص بالكادر وعندي نسخة منه وإيه العيب إن المعلم يطور نفسه ويمحو أميته في مجال الكمبيوتر ---------
أما عملية التعيين هو ده قرار من الوزير ولا من رئيس الوزراءووموافقة وزير المالية حسب الميزانية التي تحت يده -------

بالنسبة للأخ أحمد سلامه سواء الوزير يقوم بإرضاء السلطة أم لا: سبحان الله وهو فين الجديد في كده إذا كان شيخ الأزهر والمفتي ومعظم رجال الدين كل همهم إرضاء السلطة خلاص الوزير ده ملك من السماء سوف يشذ عن القاعدة ويرضيك إنت والصبح يبقى في الشارع ولكن الرجل يفعل بقدر مايستطيع ولايجد مساندة من أحد كل مايكلف ناس بمهمه يطلعوا حرامية هيعمل إيه يعني إذا كان المدرس مش قادر يسيطر على فصل فيه كام طالب وقاعدين أمام عينه وهما الوزراء إلي قبل كده قدموا إيه شالوا سنه سته ورجعوا سنة سته والدنيا تاهت وباظت في التعليم ---- أما عن وجود عجز في المدرسين في المدارس أقسم بالله أتحداك في ذلك وخاصة
بعد إلغاء مُسمى وكيل وعودتهم للعمل وبرغبتهم من أجل الكادر -- عارف هتقولي في مدارس في القرى فيها عجز كبير وأنا متأكد من كده والسبب هو المديرية التعليميه الفاشلة الإدارات الفاشلة في محافظة قنا بتوع الوسايط والكوسة -- فالزيادة رهيبة في مدارس قنا المدرسة فيها اكثر من 12 أخصائي إجتماعي لايجدوا عمل وأناأعمل في مدرسة في منطقة نائية بمفردي -- تعالى معي والله هخليك تزور مدرسة إعدادي في مدينة قنا فيها 300 حصة لغة عربية زيادة إسبوعياً لدرجة إن أحد المدرسين نصابه 2 حصة إسبوعياً وزعلان وعامل مشكلة مع المدير
ده كله علشان معاه واسطة -- ياأخي الوزارة بتاخد إحصائيات من كل مديرية سنوياً يشمل :- عدد المدارس وعدد الطلبة المقيدين في كل مرحلة وعدد الحصص لكل تخصص وعدد العاملين في مختلف التخصصات في النهاية يجدوا فيه زيادات هيعملوا إيه إذا كان العيب عندنا محلياً في سوء التوزيع بسبب الوسايط هو الوزيرهيروح يلف على كل مدرسة في الجمهوريه طيب فين دور المحافظين ووكلاء الوزارات ومديري الإدارات ورؤساء المراكز والمدن والقرى ماكلهم مسؤلين ولكن مافيش ضمير إلى القليل منهم وفي الآخر يبقى مكروه -----

طيب إحنا في إمتحان الكادرالقادم إذا لم أحصل على شهادة icdl لن أن استطيع دخول إمتحان الأكاديمية وبالتالي سوف يتم رفع الكادر مني -- هل أقول بقى دناس كذا وكذا ولا أروح أحصل على تدريب وأحصل على شهادة في هذه المجال أستفيد منها في حياتي وأمحو أُميتي في الكمبيوتر --- والله المدرس المصري الذي كان في الماضي تتسابق الدول العربية
عليه أصبح أجهل المعلمين في العالم عاوز يحصل على البكالوريوس أوالليسانس وينام على كده إلا ان يقبض الله روحه والعالم يتطور من حوله وهو نائم في حدود مادرسه من سنوات ----
روح إحضر مقابله للسفركمعلم في دولة خليجية هذه الأيام والخليجي الذي يقوم بعمل الإختبار في أخر المقابلة بيلاقي معظم من دخل المقابلة لايصلح والله بيعطوا لمدرسين لغة عربية قطعة
لإعرابها ويعجز المدرس أن يعربها عارف ليه لأن معظم الخريجين نجحوا بالغش وأعتقد
شوفت بنفسك في الدبلومة شوف في الآخريلاقيه شهادة على الورق فقط إلا من رحم ربي ---
روح للدكتور ياسر وإسأله الناس الكبيرة إلا كانوا في الدبلومة كانوا كاتبين إيه في ورقة الإجابة روح أسئله وإنت هتعرف الفاجعة وهتسمع العجب إلا القليل منهم ولذلك المفروض نلوم انفسنا قبل أن نلوم الناس وخاصة أننا لم نعرفهم ولكن بنسمع فقط وماأكثر الإشاعات والكذب الذي أصبح ميزة في المصريين -- يجب أن نطورأنفسنا ونخلص لعملنا مش كل يوم ندور على المدرس والله بيهرب ويسيب المدرسه بدون إذن وإذا دخل الفصل عاوزيشرب شاي وياكل في الفصل ويحكي مع زملاءه دون أي ضمير وكل همه يسأل عن النواحي المالية فقط وهو لايستحقها ولكن الحمد لله فيه ناس عارفة ربنا وبيعملوا بضمير بس والله قلة ------

وأنا بأحترم الأستاذ الدكتور أحمد ذكي بدر وربنا يكثر من أمثاله وأدعو الله أن يبقى في هذه الوزارة سنوات طويلة ولاتتم إقالته مثل باقي الوزراء المخلصين الذين تمت إقالتهم من قبل ويكفي قضائه على اللصوص والحراميه ومازال ويكفي أن هيبة المدرس التي ضاعت على يد بهاء الدين ومن أتى بعده بدأت تعود على يد أحمد ذكي بدر ولن أنسى مقولته على شاشة القناة الثانية عندما قال { لولم يضربني المدرس وأنا طالب ماكنت وزيراً الآن} -- اللهم أرزقه البطانة الصالحة التي تعينه على الخير وأدعو الله أن يقوم بزيارات مفاجئة لمحافظة قنا لكي يقضي على الفساد المنتشر في التربية والتعليم فيها اللهم أستجب وأنت القادر على كل شيء

وعليكم السلام ورحمة الله وبركاته
ايه يا استاذ خالد اقول لحضرتك بكرهه تقلى انه
مكروه من اعداء النجاح Rolling Eyes

كدا برضو خليتنى من اعداء النجاح
عمومايااستاذنااناوالله مش معترضه على الدبلومه ولا الاى سى دى ال بدليل انى عملتهم حتى قبل ما افكر اشتغل
اما عن قرار منع التعيين انا طبعا معرفش هو صادر عن مين بالظبط بس اقدر اقول لحضرتك
برضو حسبى الله ونعم الوكيل فيهم لانى عدم وجود ميزانيه دوت بسبب النهب فى اموال الدوله
من المسئولين والله اعلم المصلح من المفسد
ورغم انفهم جميعا فان شاء الله حنشتغل لان الله
لا يضيع اجر من احسن عملا مهما اصدروا من قرارات
ربنا قادر انه يقلب الامور كلها لصالحناولصالح الشعب
وجزاك الله خيرا استاذى على ردودك ومعلوماتك القيمه جزاك الله عنا جميعا خيرا

السلام عليكم ورحمة الله وبركاته

والله ياسارة لم أقصدك أنتي بأعداء النجاح ولكن الناس الكبيرة في الإعلام وفي

الوزارة وغيرهم -- وإن شاء ربنا يوفقك لأنك مهذبة ومجتهدة وتستحقي كل خير

» هل رايت زبد البحر من قبل
» معلومات غريبه جدا جدا استغربت لما ......