إضراب مرشحتان عن الطعام بقنا

إضراب مرشحتان عن الطعام بقنا لعدم إدراج اسميهما بكشوف الإنتخابات

دخلت مرشحتان في إضراب عن الطعام بمستشفى قنا العام احتجاجا على رفض الجهات المختصة تنفيذ قرار محكمة القضاء الإداري ادراج اسميهما بكشوف المرشحات في انتخابات مجلس الشعب المقبلة كان اللواء عادل مهنا مدير أمن قنا قد تلقى إخطاراً بقيام كلا من انتصار عليو مرشحة كوتة المرأة على مقعد ''العمال'' وحنان الطاهر المرشحة على مقعد ''الفئات'' مستقلتين بالاضراب عن الطعام بمستشفى قنا العام احتجاجا على رفض محكمة ومديرية أمن قنا واللجنه الفرعيه للانتخابات ادارج اسميهما في كشوف المرشحين ورفضهم تنفيذ قرار محكمة القضاء الإداري بادراجهما بكشوف المرشحين.. تم تحرير محضر بالواقعة وإحالته للنيابة العامة بقنا

*ملحوظة / حنان طاهر: كانت معنا في الدبلومة العامة نظام العام الواحد 2009-2010
وهي من مركز أبوتشت -- العملية والله أصبحت صراع وهيصة على الكرسي من أجله فقط

لا حول ولا قوة إلا بالله

الصراحة أنا مش عارفة أقول غير

شكرا أستاذى الكريم على موضوعك

ربنا يشفى عنا وعنهم

فعلا يا أستاذ خالد الشئ اللى جميع العقلاء فى بلدنا يعرفوه كويس ان الصراع فى الانتخابات بيكون على الكرسى وما وراء الكرسى من مصالح وحصانة واستغلال ، وغير ذلك الكثير الا مارحم ربى - ماهو أصله مولد وصاحبه غايب - بدليل كثرة اللافتات التى تملأ الشوارع بطريقة مبالغ فيها ، وتلاقى اعلان ( بوستر ) للعضو مكلف عليه تكلفه جامدة طول العمارة ، وتلاقيه طول الفترة دى بيعمل اتصالات مكثفة بطوب الأرض ، علشان يعدى فوسط الهيصة دى ، الى غير ممكن تلاقى ناس داخلة فى الهيصة مقابل مبالغ من المال ، علشان يقولوا بلدنا نزيهة ، طبعا ماهما مش عاملين كدة علشان خاطر عيون الشعب الغلبان ،

واتحدى واحد يقوللى فلان ده نازل الانتخابات علشان خاطر عيون أهل دائرته لوجه الله ، ممكن الواحد فيهم يخدمك وتمام التمام ، بس متعرفشى هو بيستغل منصبه ازاى فأمور تانيه كتجارة الآثار وتهريب المخدرات ، وما شابه ذلك ، وظاهر أمام الناس بالرجل الخدوم التقى .

ومفيش مانع لما يرضى أهل دائرته ويبل ريقهم شويه ، ماهى دى السياسه ،
وزى ما قلت موووووووولد وصاحبه غاااااااااااااايب ، واهبش اللى تقدر تهبشه قبل ما يخلص المولد ، وأهم شئ ميحسش حد بيك ، وريحتك متفيحشى ، لأنك لو ريحتك فاحت يامعلم يبقى مع السلامه باى باى ، ماهو أصل الهبش فن مش أى كلام .

ويقولك صوتك أمانه ، طيب أنا أساسا ماعرفشى نية كل واحد فيهم عامله ازاى ، ممكن يكون بيخدم الناس ، ولكن ليه هدف تانى هو داخل علشانه ، أقوم أنا بقى أديله صوتى ، وأشيل الوزر معاه ، وبصراحة فأيامنا دى وظروفنا دى صعب تآمن لواحد فيهم ، والواحد ساعتها يوفر صوته لنفسه ، لأن صوته فالأول وفالآخر لا هيقدم ولا هيأخر ،

يعنى " المعلقة فى النعناع " .

شكراً لدموع تائبة والأخ أحمد سلامة -- بس أنا ياأحمد مش هوفرصوتي
لازم أديه لأي حد بعد ماسأل بقدر المستطاع ولو طلع حرامي بعد كده يبقى
أنا عملت إلي عليا وماقعدتش سلبي لأن الساكت عن الحق شيطان أخرس
ياحماده روح وحُط صوتك عندك الأستاذ محمد عبدالنبي { فئات } وعندك
الحاج حمدي حسن قريع { عمال } وهنشوف إمرأة تستحق الصوت إن شاء
الله -- المهم لازم تروح وأنا عندما لاأقتنع بأي عضو أذهب إلى لجنة الإنتخابات
وأدخل خلف الستارة وأعمل علامة إكس على الجميع وبالتالي يبقى صوتي باطل

* ويبقى كده ماسبتش ورقتي لواحد منافق يزورها لعضو حرامي وكذاب *

وهنتظرك ياأحمد يوم الإنتخابات نخرج سوياً ونتفقد الرعية وأفطرك على حسابك

هههههههههههه ليه التدبيسه دى بس يا كبير ، بس أنا لا أمتلك بطاقة انتخابيه ، ما الحل ؟؟؟؟؟؟
ومافتكرشى انى ممكن اجرى عليها علشان أعملها ، وبعدين ما اقابلكشى يا أستاذ خالد الا فى اليوم العصيب ده ، حد ضامن يمكن يكون فيه ضرب نار ، اتنش رصاصة كده والا كده أروح فيها ، وارتاح واريح الناس .
وان كان على الفطار ولا يهمك مقدور عليه ، بس خللى بالك الغداء عليك ،
وبعدين يا كبير هو الأستاذ محمد ، والحاج حمدى تبع منطقتك والا منطقتى والا تبع قنا كلها ، معلش أصلى هنا فقنا ثقافتى الانتخابية ميح ، ولما كنت فالقاهرة كنت اعرف ان كل منطقة ليها مرشحينها ، ماعرفشى الوضع هنا ايه ،
عـــــــــــــــامة مش هنختلف ، وربنا يســـــــــــترها .

هههههههههههههههههههههههه لأ ياأحمد كل دائرة المفروض ينجح فيها 2 مرشحين يعني مركزومدينة قنا الإثنين إلي ذكرتهم أعلاه مع كل المكتوب صورهم وإعلانتهم في شوارع قنا -- أما المرأة مطلوب 2 فقط على مستوى المحافظة كلها وإن شاء الله يوم الإنتخاب وإنت عازمني على الفطار هديلك درس في الموضوع ده ينفعك في المستقبل إن شاء الله وأنا سمعت إنك ممكن تصوط ببطاقة الرقم القومي ومش عارف إحنا ليه مترشحناش والله السنة دي مترشح ناس هلس كتير وإن شاء الله ماينجحوا أبداً لإنهم لو نجحوا هيروحوا يؤدوا فريضة الحج في تل أبيب بدل من مكة ياعم يوم الأحد وإنت بتفطرني هشرح لك كل حاجة دإذا ماأخدونيش إلي مايتسموش وربنا يستر كفاية كده ياعم لايكون حد سامعنا -- سلام

السنة الجاية ان شاء الله يااستاذ خالد ... ترشح نفسك فى الانتخابات

وانا السنة اللى بعدها ....... علشان اللى مايتسموش مايقدروش يعملولنا حاجة

الإنتخابات كل 4 سنوات ياحنين يعني إن شاء الله آخر2014 نكون في العالم الآخر ربنا يديكي العُمر الطويل

آآآآآآه كده فهمت ياكبير ووضحت الصورة ، وفيها درس كمان ينفعنى للمستقبل ماشى ياكبير شكله الموضوع كبير وعاوزله قعده فعلا ،
هههههههههه وشكلى بدل ما أنا اللى هاصوط هيصوطوا عليا ،
وليه بس نجيب سيرة اللى ما يتسموش ، ربنا يجعل كلامنا خفيف عليهم ، بس مكانشى فيه داعى نجيب سيرة الحاج محمد ، كنا خليناه بينى وبينك لحد مانتقابل ، أصلى سمعت عنه انه من اللى بالى بالك ، واللى بالى بالك مفيش بينهم عمار وبين اللى ما يتسموش ، بس الحاج حمدى ماعرفشى عنه منين بالضبط ، وشكله كدة زى الحاج محمد ، وربنا يسترها علينا ، عامة نعمل حسابنا نجيب معانا عيش وحلاوة لزوم القعده علشان باين كدة ان القعده هتطول ،
ترشح نفسك ايه ياكبير ، برضه دة كلام ، دة مش من مقامك ، أنا سمعت الأموات دلوقتى كمان بقوا بيصوطوا ، ازاى ماعرفشى .
بس أنا بصراحة دايما باقول من سمات بلدنا النزاهة فى كل حاجة ، نزيهة نزيهة يعنى ، شوف حتى الميت ليه صوت ، أنا راضى ذمتك ياكبير ، شفت " نزاهــــــــــــة " أكتر من كدة .

بصراحة لأ ياأحمد البلد الوحيدة في العالم إلي الميت بيطلع من قبره بقدرة حزب
ويصوت في الإنتخابات هي أم الدنيا مصروربنا يجعل بلادنا مباركه ونظيفه

كل اربع سنين عندهم هما يااستاذ خالد ... لكن فى سنتنا احنا ان شاء الله هنخليها كل سنة

لأ يا كبير حرام علينا مش عاوزين نظلمهم ، الحقيقة هما مش بيتعبوا الأموات ويخلوهم يخرجوا من مقابرهم ، هما بيقوموا بالواجب كأنهم موجودين نيابة عنهم ، وبيبعتوا ناس مخصوص تروح للمقابر ، وياخدوا آراء الأموات ، وبعد كدة يروحوا هما بدالهم ويخلصوا ،
وبعدين خللى بالك بلدنا فريدة من نوعها فى الموضوع ده على مستوى العالم ، ليه بقى لأنى زي ما قلتلك قبل كدة نزيهة ، ونظيفة كمان ، ومتلاقيش دولة على مستوى العالم فى نزاهتها ، ولا نظافتها .
حقيقى صدق اللى قال " عظيـــــــــــــمة يا مصـــــــــــــــر " .

» القرض الدوار بقنا
» البركة في الطعام???
» من آداب الطعام
» لتنقذى المتبقى من احتراق الطعام
» لاتنفخ فى الطعام او الشراب الساخن