سلسلة ::.:: صح وغلط وقصة طريفة ::.::

نبدأ بحمد الله سلسلة

" صح وغلط وقصة طريفة "

وبدون مقدمات كتير ..

مع الحلقة رقم 1

1- صح :-

في جزء " صح " بمناسبة بداية شهر رمضان .. دايما أحب أذكر بحديث مهم جدا مع بداية الشهر المبارك

ألا وهو حديث :

من صام رمضان إيمانا و احتسابا غفر له ما تقدم من ذنبه ، و من قام ليلة القدر إيمانا و احتسابا غفر له ما تقدم من ذنبه
الراوي: أبو هريرة المحدث: الألباني - المصدر: صحيح الترغيب - الصفحة أو الرقم: 992
خلاصة حكم المحدث: صحيح

إذن حتى تتحقق المغفرة ويُغفر لنا ما تقدم من ذنوبنا لابد من شرطان ..

أن يصوم الإنسان إيمانا و إحتسابا ... الأمر يحتاج لنية

إيمانا : بالله و بما أنزل و بما فرضه علينا ... فنصوم لأنه فرض علينا يجب صيامه ... و لأنه من أركان الإسلام ... مش لأننا بنصوم علشان متعودين نصوم .. علشان كله بيصوم .. علشان عيلتنا كلها بتصوم .. لا

الموضوع لازم يكون عبادة مش عادة بنصوم علشان ربنا فرض علينا صيام الشهر ده .. فبنتعبد لله بالصيام

و إحتسابا : نحتسب الأجر و المغفره ...و إنى بصيامى هذا أحتسب أن يغفر الله لى ما تقدم من ذنبي ..وأنى سأثاب بهذا الصوم

وممكن حد يسبق الثاني بكثيير بسبب النية الصحيحة .. فنحسن النية حتى يغفر لنا ما تقدم من ذنوبنا برحمة الله

هذا كان توضيح بسيط جدا للحديث ... و نرجو تحقيق هذين الشرطين ... حتى يغفر الله لنا ما تقدم من ذنوبنا ...

2- غلط :-

طبعا ومع بداية شهر رمضان .. تلاقوا كثييييير جداااا من الأئمة في الخطب وتلاقي في الراديو والتلفزيون حديث مشهوووور جدا مع بداية رمضان

أظن أن كلكم سمعتوه كثير .. عن نفسي اليوم فقط سمعته مرتين .. مره في إذاعة القرآن الكريم

ومره في مسجد

الحديث هو خطبة الرسول عليه الصلاة والسلام المشهورة المزعومة :

عن سلمان رضي الله عنه قال خطبنا رسول الله صلى الله عليه وسلم في آخر يوم من شعبان قال يا أيها الناس قد أظلكم شهر عظيم مبارك شهر فيه ليلة خير من ألف شهر شهر جعل الله صيامه فريضة وقيام ليله تطوعا من تقرب فيه بخصلة من الخير كان كمن أدى فريضة فيما سواه ومن أدى فريضة فيه كان كمن أدى سبعين فريضة فيما سواه وهو شهر الصبر والصبر ثوابه الجنة وشهر المواساة وشهر يزاد في رزق المؤمن فيه من فطر فيه صائما كان مغفرة لذنوبه وعتق رقبته من النار وكان له مثل أجره من غير أن ينقص من أجره شيء قالوا يا رسول الله ليس كلنا يحد ما يفطر الصائم قال يعطي الله هذا الثواب من فطر صائما على مذقة لبن أو تمرة أو شربة من ماء ومن أشبع صائما سقاه الله من الحوض شربة لايظمأ حتى يدخل الجنة وهو شهر أوله رحمة ووسطه مغفرة وآخره عتق من النار فاستكثروا فيه من أربع خصال خصلتان ترضون بهما ربكم وخصلتان لاغنى بكم عنهما أما الخصلتان اللتان ترضون بهما ربكم فشهادة أن لاإله إلا الله وتستغفرونه وأما الخصلتان اللتان لاغنى بكم عنهما فتسألون الجنة وتعوذون من النار

مش سمعتوه كثير ؟؟

هذا الحديث رغم شهرته الكبيرة .. حديث منكر .. لا يصح ولا يثبت عن الرسول صلى الله عليه وسلم

الحديث ده لم يقله الرسول صلى الله عليه وسلم .. فيجب الحذر من هذا الحديث ومن ترديده لأنه ضعيف سندا ومتنه منكر

متنه يعنى محتوى الكلام به .. منكر يعنى يخالف أحاديث أخرى صحيحة .. وإن قاله أمامك أحد حاول أن تنصحه بينك وبينه مش قدام الناس وتبينله أنه حديث غير صحيح.

3- قصة طريفة :-

بمناسبة القيام في شهر رمضان ..

قال ابن الجوزي -رحمه الله -في كتابه أخبار الحمقى والمغفلين :

وكان أعرابي يصلي ، فأخذ قوم يمدحونه ويصفونه بالصلاح -وهو يصلي ويسمعهم - ، فقطع صلاته وقال : مع هذا إنى صائم ..
!!

نسأل الله الإخلاص ونعوذ بالله من الرياء ..

الرجل من كثر ما عجبه كلام الناس خرج من الصلاة علشان يقولهم انه صايم كمان .. مش بس بيصلي كويس ..ده كمان صايم علشان يبدأوا فقرة جديده في مدحه

فالشاهد إننا يجب أن لا نعجب بكلام الناس عنا ولا نفرح بمديح الناس لنا فيسبب هذا الرياء فينا ويذهب الإخلاص
وتذكر فعل سيدنا أبو بكر الصديق -رضى الله عنه- عندما كان يمتدحه أحد فكان يبكي ويقول :

اللهـــــــم أنت أعلم بي من نفســي
وأنـــــــا أعلــم بنفســــي منهــــــم
فاجعلنـــــي خيراً ممــا يحســـبون
وأغفر لي برحمتك ما لا يعلمون
ولا تؤاخذنــــي بمـــا يقولـــــــون

فنبدأ بالاخلاص إن شاء الله ونبعد عن الرياء حتى يُتقبل منا بفضل الله

بكده خلصت الحلقة الأولى .. يارب متكونوش زهقتوا ..
وجزاكم الله خيراً
___________________
ابسط ما تساهم به نشر الحلقات ولو بالايميل

thank you

ازيكم
هكلمكم عن
‏"النانوتكنولوجي"
وهي تقنيه حديثه تتعامل مع العناصر عند تفتيتها الي اجزاء صغيره جدا مثل جزيئات الذهب التي يمكن اضافتها الي العلاج الكيميائي وعند تسليط الضوء عليها فانه تتولد حراره قادره علي قتل الخليه السرطانيه التي تختلف عن الخليه العاديه في وجود كميه كبيره من البروتين

بارك الله فيكِ أختي الكريمة zahraa

يمكنك إنشاء موضوع خاص بكِ وحدك منفرد وتختارين القسم المناسب للموضوع قبل وضعه ويمكنك ذلك عن طريق الدخول في القسم المناسب الذي ستضعين فيه الموضوع ثم تضغطي علي أيقونة إرسال موضوع جديد الموجوده أعلي الصفحة أسفل رمز المصحف , وتوجد أيضا نفس الايقونة أسفل الصفحة ثم تكتبين عنوان الموضوع والموضوع ثم تضغطي ارسال وبذلك تكونين أرسلتي موضوع خاص بك مستقل وليس مساهمة رد في موضوع عضو آخر .

شكرا لمرورك بالموضوع

الحمد لله وحده والصلاة والسلام على من لا نبى بعده

ومع الحلقة رقم 2

من سلسلة

" صح وغلط وقصة طريفة "

1- صح :-

زي مقلنا بالأمس حديث ثمرته هي مغفرته ما تقدم من الذنب

انهارده الفرصة رقم 2 لنيل نفس الجائزة ..وزي مكانوا بيقولوا :

كل ما تشتري أكثر فرصتك في الفوز تكبر

وطبعا كل متزوّد الأعمال اللى ليها نفس الثواب .. يبقى فرصك في الفوز بهذا الثواب أكثر

طيب ايه بقه الفرصة الثانية ؟؟ الأولى كانت صيام شهر رمضان بس بشرطين .. ايمانا واحتسابا

اليوم حديثنا عن القيام بس برضه بشرطين .. هما نفس الشرطين .. ايمانا واحتسابا

قال رسول الله صلى الله عليه وسلم :

"من قام رمضان إيمانا واحتسابا غفر له ما تقدم من ذنبه"

يبقى مثل ما قلنا بالأمس .. الأمر يحتاج لنية .. مش مجرد نروح نصلي تراويح علشان اتعودنا من صغرنا نروح .. وعلشان كل الناس بتروح ويعنى حقعد انا في البيت وصحابي وعيلتى رايحين .. يلا انا كمان بدل مقعد لوحدى ..

مش نروح نصلي التراويح والقيام علشان مبقاش الوحيد بين صحابي اللى مبروحش او علشان اروح اصلي مع صحابي وبعدها نخرج ..

لا قيام رمضان يحتاج لنية .. نية للتعبد .. مش مجرد عادة .. لازم نجدد النية واحنا رايحين نصلي .. رايحين نصلي عبادة لله خالصة لوجهه .. قيام علشان ربنا أراد منا قيام الشهر والرسول حثنا على قيامه .. طاعة لله واتباعا للنبي صلى الله عليه وسلم

احتسابا يعنى نحتسب الأجر ويكون الأجر ظاهر قدام عيننا نرجو اننا نحصل الأجر ده

2- غلط :-

كثير نسمع بعض الخطباء أو الأئمة أو حتى إذاعة القرآن الكريم .. يقولك شهر رمضان شهر الأمة .. ويروح قايل حديث ..
الحديث ده بيتكرر كثير ..

الحديث بيقول :-

" رجب شهر الله ، وشعبان شهري ، ورمضان شهر أمتي"

مش سمعتوا الحديث ده قبل كده ؟؟ اهو الحديث ده ضعيف

واللى مسمعوش قبل كده يعرف انه ضعيف علشان ممكن يسمعه في اى وقت مع بداية شهر رمضان .. وزى مقلنا التنبيه

على اللى قال حديث ضعيف يكون بطريقه كويسه وبينك وبينه

3- قصة طريفة :-

بمناسبة القيام وقراءة القرآن .. ينبغى ان نحرص على التركيز فيما نقرأ أو نسمع من القرآن .. وإن أُشكل علينا فهم شئ أو لم نفهمه نرجع لكتاب للتفسير لنفهم

مش نفهم القرآن بمزاجنا على غير مراد الله..

مش زي الأعرابي اللى ذكر قصته ابن الجوزي -رحمه الله- في أخبار الحمقى والمغفلين ..

قال ابن الجوزي -رحمه الله- :-

وصلى بعض الأعراب خلف بعض الأئمة في الصف الأول ، وكان اسم الأعرابي (مجرماً) فقرأ الإمام : والمرسلات عرفا ... إلى قوله (أَلَمْ نُهْلِكْ الْأَوَّلِينَ) فتأخر البدوي إلى الصف الآخر ، فقرأ الإمام : ( ثُمَّ نُتْبِعُهُمْ الْآخِرِينَ) ، فرجع إلى الصف الأوسط ،فقرأ الإمام : ( كَذَلِكَ نَفْعَلُ بِالْمُجْرِمِينَ) ، فولى هاربا وهو يقول : ما أرى المطلوب غيري .

يعنى هذا الأعرابي صلى خلف الإمام والظاهر إنه مش حافظ تلك السورة فكأنه أول مرة يسمع تلك السورة .. ولما سمع مفهمش معناه الحقيقى ومراد الله منه مفكرش يسال او يعرف التفسير .. لا .. فهم بمزاجه .. خد الكلام على ظاهره.. فكان هو في الصف الأول .. سمع الإمام يقول : ( ألم نهلك الأولين ) فساب الصف الأول ورجع لاخر صف .. لقى الإمام يقول : ( ثم نتبعهم الآخرين ) راح سايب الصف الآخر ودخل في اللى في النص .. لقى الإمام يقول : ( كذلك نفعل بالمجرمين ) وهو اسمه مجرم فساب الصلاة وطلع يجري .. وقال انا المقصود بالكلام ده

أكيد طبعا المقصود بالهلاك مش المصلين يعنى ولا أماكنهم جوه الصلاة .. لكن نعمل ايه بقى في المغفلين

فنحاول أن نفهم القرآن على مراد الله عزّ وجلّ يعنى نشوف كتب التفسير .. نسأل شيخ يكون عارف التفسير .. منحاولش نفهم القرآن بمزاجنا .. لربما كان المعنى اللى فهمنا غير المقصود تماما .. ومنعملش زي مجرم ..

بكده خلصت الحلقة الثانية .. يارب متكونوش زهقتوا ..

وبكره إن شاء الله نلتقى في الحلقة الثالثة إن شاء الله

وجزاكم الله خيراً
___________________

ابسط ما تساهم به نشر الحلقات ولو بالايميل
___________________

ماشاء الله طرح رائع اخت هبه الله

جزاك الله خيرا نفع بكِ

وجزاكِ الله المثل وزياده أختي الكريمة دموع تائبة

أسعدني مرورك العطر بالموضوع

جزاكِ الله خيراً أختى الغالية على هذا الطرح الراائع
جعلنا الله وإياكم ممن يستمعون القول فيتبعون أحسنه

ما شاء الله عليكي اختي
جزاك الله خيرا
اسلوبك اكثر من رائع
ياريت الناس تبطل رياء

خادمة القرءان كتب:: جزاكِ الله خيراً أختى الغالية على هذا الطرح الراائع
جعلنا الله وإياكم ممن يستمعون القول فيتبعون أحسنه

وجزاكِ الله المثل وزياده

ومن الرائع تواجدك

اللهم آآآآآآآآآآآآآآآآمين

أسعدني مرورك العطر بالموضوع

zahraa.biology كتب:: ما شاء الله عليكي اختي
جزاك الله خيرا
اسلوبك اكثر من رائع
ياريت الناس تبطل رياء

وجزاكِ الله المثل وزياده

إحقاقا للحق هذا ليس أسلوبي أسلوب أختنا أم عمير بارك الله فيها

اللهم آآآآآآآآآآمين يهدي أمة المسلمين

أسعدني مرورك الكريم بالموضوع

ومع الحلقة رقم 3

من سلسلة

" صح وغلط وقصة طريفة "

1- صح :-

جزء صح بتاعنا انهارده .. حيكون حديث .. والحديث ده يتضمن احياء سنة

...
وانت رايح تصلى التراويح او وانتِ رايحة تصلي التراويح

كثييير جدا بعد أول أربع ركعات تلاقى ناس كثير روحت

والأكثر منه بعد ال 8 ركعات وقبل صلاة الوتر تلاقى أفواااج بتمشي

زي ميكون الإمام حيصلى الوتر بره المسجد وهما طالعينله

طيب مشيوا ليه ؟؟ وراهم حاجه مهمه ؟؟

لا

طيب تعبانين أو مريضين ؟؟

برضه لا

طيب قاموا ليه ؟؟

مفيش .. كفاية كده .. نبقى نصلي في البيت بقه الوتر ..

طيب ده صح ولا غلط ؟؟

لا غلط .. طيب ايه الصح ؟؟

الصح إن الرسول عليه الصلاة والسلام قال :

" إنه من قام مع الإمام حتى ينصرف كتب له قيام ليلة "
الراوي: أبو ذر الغفاري المحدث: الألباني - المصدر: إرواء الغليل - الصفحة أو الرقم: 2/193
خلاصة حكم المحدث: إسناده صحيح رجاله كلهم ثقات

يعنى ايه بقه ؟؟ يعنى اللى يصلي مع الإمام لحد ما الإمام يخلص

يكتب ليه قيام الليلة .. يعنى الصح اننا نصلي مع الامام لحد ميخلص خااااالص وينصرف

طيب احنا بنحب نصلي الوتر بليل في البيت قبل الفجر .. نعمل ايييييه ؟؟

تصلى مع الامام الوتر ولما يسلم قوم صلى ركعة كمان .. يبقى انت مصلتش وتر

وفي نفس الوقت مضيعتش عليك أجر قيام الليلة

2 غلط :-

كثير جدا لما حد يعمل عمل كويس أو عمل خير ..

نلاقى الناس اتبسطت كده وراحت قايله :

يا سلاااام .. فعلا .. زي ما النبي -عليه الصلاة والسلام - قال :

" الخير في وفي أمتي إلى يوم القيامة"

وتلاقى اللى معاه راح قايل : ااااه .. صدق رسول الله

هو طبعا صدق رسول الله -صلى الله عليه وسلم - ..

بس الرسول مقالش الكلام ده ..

الحديث ده : لا أصل له

اختراع يعنى

حاجه مش موجوده فى كتب السنة أصلا

فنحذر من الحديث .. بس فيه حديث تانى صحيح ويفيد نفس المعنى ..

حد عارفه ؟؟

فكروا وحنقولوا إن شاء الله في حلقة قادمة

3- قصة طريفة :-

بمناسبة جزء الغلط الثابت في حلقتنا

كثير منا بيعمل الغلط علشان لقى الناس بتعمله

وده في حد ذاته غلط .. لأنه متأكدش اللى بيعملوه صح ولا غلط

ايه بقى الكلام اللى محدش فاهم منه حاجه ده ؟؟

اقرأ القصة ديه وانت تفهم :-

ذكر ابن الجوزي -رحمه الله- أن بعضهم قال :-

" و مررت بقوم اجتمعوا على رجل يضربونه ، فقلت لرجل يجيد ضربه : ما حال هذا ؟ قال : والله ما أدري ما حاله ، ولكنى رأيتهم يضربونه فضربته معهم لله عزّ وجلّ وطلبا للثواب "

ده من غير ميعرف هما بيضربوه ليه أصلا .. وخلي بالك من حتة انه بيضربه لله وطلبا للثواب ديه

كثير منا نفس الكلام شاف الناس بتعمل فعمل .. من غير ميعرف اللى بيعملوه صح ولا غلط

يعنى كثير يجيلك ايميل فيه حديث موضوع مكذوب .. من غير منفكر نعرف صحيح ولا لا ..

على طوووووووووووووول ندوس على

Forward

وتكتب ايميلات صحابك وصحاب صحابك واللى يعرفوا صحابك واللى ميعرفوش صحابك

وانت في دماغك انك بتعمل كده طلبا للثواب وبتعمله لله

وانت بتساهم في نشر كلام كذب عن النبي صلى الله عليه وسلم

والغريب ان لو جاله حديث صحيح .. ميبعتوش !!

يقولك ما هو الناس تلاقيها عارفاه !!

فلازم نتأكد قبل مننشر حاجه عن الدين أو نساهم في حاجه أنها صح ولا غلط

مش علشان لقينا صحابنا بيعملوها .. نعملها

بكده خلصت الحلقة الثالثة يارب متكونوش زهقتوا ..

وبكره إن شاء الله نلتقى في الحلقة الرابعة إن شاء الله

وجزاكم الله خيراً

___________________

ابسط ما تساهم به نشر الحلقات ولو بالايميل

ماشاءا الله جميله يا هبه الله
جهد رائع ونقل طيب

بانتظارك فى الجديد بعون الله

وبمناسبه الاحاديث المكذوبه
لازم كل واحد مننا ياخد باله من الحديث يا جماعه
وانصحكم بالدرر السنيه لمعرفه الحديث وصحته

ذلك فضل من الله وجعلت سبب فيه

بارك الله فيكِ أختي الكريمة دموع تائبة

أسعدني مرورك الكريم بالموضوع

ومعكِ حق علي المسلم أن يتحري الاحاديث وفعلا الرر السنية موقع طيب وذلك رابطه

[ندعوك للتسجيل في المنتدى أو التعريف بنفسك لمعاينة هذا الرابط]

ومع الحلقة رقم 4

من سلسلة

" صح وغلط وقصة طريفة "

1- صح :-

في جزء صح اليوم حيكون مرتبط شوية بجزء غلط .. الاثنين في موضوع واحد

وهو ممكن نقول عليه من احياء السنن

وهو موضوع السحور فموضوع السحور مهم جدا

وللأسف لا يلتفت كثير منا لأهميته

قال الرسول صلى الله عليه وسلم :-

" تسحروا فإن في السحور بركة "
الراوي: أنس بن مالك المحدث: البخاري - المصدر: صحيح البخاري - الصفحة أو الرقم: 1923
خلاصة حكم المحدث: [صحيح]

الرسول صلى الله عليه وسلم أمرنا وحثّنا على السحور

كثير منا لا يتسحر ولا يستيقظ للسحور .. يستيقظ على صلاة الفجر على طول

- ده إن صحي أصلا -

تسأله اتسحرت انهارده .. يقول لا ..

طيب لا ليه ؟!؟

مفيش أصلي مبعطش ولا بجوع يعنى .. مش محتاجله يعنى

تحس ان جمل بيتكلم مش انسان
..

كثير ممكن يكون كده .. وكثير فعلا كده

فوالله لو لم يكن في السحور غير الاستجابة لأمر الرسول -صلى الله عليه وسلم- لكفى .

فالسحور به بركة تظهر بوضوح في وقت الصيام من الفرق بين النشاط والكسل

بين اللى تلاقيه تعبان واللى تلاقيه فايق.

فنحرص على السحور إن شاء الله

ونحرص على اتباع أمر النبي عليه الصلاة والسلام

2- غلط :-

من الحاجات الغلط ان كثير من الناس اللى مواظبة على سنة السحور

بيتسحروا في وقت بدري عن وقت السحور

تلاقي ناس بتتسحر قبل متنام ..ممكن قبل الساعه 12 ويصحى على الفجر

وطبعا زي مكلنا عارفين .. لازم اكتب شرطتين وبينهم

- ده إن صحي-

وناس تتسحر قبل الفجر بساعتين وساعه

الكلام ده غلط .. ده خلاف السنة

لإن الرسول عليه الصلاة والسلام قال :

" عجلوا الإفطار و أخروا السحور "

والسنة إن السحور يكون في وقت السحر .. ولأن وقت السحر فيه بركة

فكان في السحور بركة

ايه بقه وقت السحر ده يعنى علشان مش واخدين بالنا ؟؟

السحر ده هو الوقت اللى قبل الفجر بحاجه بسيطة

وعلشان كده اتسمى السحور سحورا .. علشان بيبقى في وقت السحر

فاللى بيتسحر قبل الفجر باربع وثلاث ساعات ده خرج السحور بره وقته

فهو بكده ما أدركش السنة ولا فاز ببركة السحور

طيب انت متأكد ان السحور المفروض يبقى في الوقت ده قبل الفجر على طول ؟؟

طيب نشوف الحديث ده .. وهو حديث في صحيح البخاري
- يعنى أكيد صحيح -

" عن أنس: أن نبي الله صلى الله عليه وسلم وزيد بن ثابت تسحرا فلما فرغا من سحورهما قام نبي الله صلى الله عليه وسلم إلى الصلاة فصلى . قلنا لأنس: كم كان بين فراغهما من سحورهما ودخولهما في الصلاة ؟ قال: قدر ما يقرأ الرجل خمسين آية "

يعنى الفرق بين انتهاء السحور والصلاة وقت قراءة خمسين آية .. يعنى ممكن حوالى ربع ساعه مثلا

فالغلط تعجيل السحور .. والصح تأخيره لقبل الفجر بحاجه بسيطة

يبقى نصحى قبل الفجر ب نصف ساعه مثلا

نصلى ركعتين ونتسحر ونصلى الفجر

3- قصة طريفة :-

من غير مقدمات كثير

قال ابن الجوزي -رحمه الله- :

وخرج رجل إلى السوق يشتري حمارا ، فلقيه صديق له فسأله : إلى أين ؟ فقال : إلى السوق أشتري حمارا ، فقال : قل إن شاء الله ، فقال : ليس ها هنا موضع إن شاء الله ، الدراهم في كمي والحمار في السوق ، فبينما هو يطلب الحمار سرقت منه الدراهم فرجع خائبا ، فلقيه صديقه ، فقال له : ما صنعت ؟ فقال : سرقت الدراهم إن شاء الله ، فقال له صديقه : ليس ها هنا موضع إن شاء الله .ا

نستفيد ان لما حد فينا يكون على غلط وحد ينصحه بالصح .. ميعاندش ويصر على الغلط علشان ميندمش ويرجع يحاول يعمل الصح ... بس بعد فوات الأوان

ونستفيد برضه سرعة التنفيذ .. يعنى متأجلش حاجه كويسه .. لو حد نصحك بحاجه صح متأجلهاش .. نفذ فورا

حاجه تانية نستفيدها .. أبدا متفكرش انك مستغنى وانك تقدر تعمل حاجه من نفسك .. لا احنا فى الاوقات محتاجين لربنا
واحنا لا حول ولا قوة لنا إلا بالله .. مهما كبرت أو عليت انت فقير إلى الله

ولما تهم بعمل شئ قل : إن شاء الله ..لا تنساها أبدا

بدل متيجى تشترى الحمار تلاقى الفلوس طارت إن شاء الله

بكده خلصت الحلقة الرابعة يارب متكونوش زهقتوا

وبكره إن شاء الله نلتقى في الحلقة الخامسة إن شاء الله

وجزاكم الله خيراً

___________________

ابسط ما تساهم به نشر الحلقات ولو بالايميل

هبة الله كتب:: ذلك فضل من الله وجعلت سبب فيه

بارك الله فيكِ أختي الكريمة دموع تائبة

أسعدني مرورك الكريم بالموضوع

ومعكِ حق علي المسلم أن يتحري الاحاديث وفعلا الرر السنية موقع طيب وذلك رابطه

[ندعوك للتسجيل في المنتدى أو التعريف بنفسك لمعاينة هذا الرابط]

فتح الله عليك اختاه واحسنتِ لوضعك الرابط هنااا بوركتِ

حاجات جميله جدااا

تعرفى يا هبة الله انه اكبر غلط بنعملوه هو ان الناس لا تتسحر فى الوقت الصحيح

ربنا يهدى
بجد موضوع رائع

وبجد من الجميل متابعتك وتواجدك في الموضوع

أختي الغالية دموع تائبة

اللهم أهدنا وجميع المسلمين

أسعدتني متابعتك للموضوع

هبة الله كتب:: وبجد من الجميل متابعتك وتواجدك في الموضوع

أختي الغالية دموع تائبة

اللهم أهدنا وجميع المسلمين

أسعدتني متابعتك للموضوع

ااااااااااااااامين واياك يا هبة الله

ومع الحلقة رقم 5

من سلسلة

" صح وغلط وقصة طريفة "

1- صح :-

مما دفعنى للحديث عن أمر السحور في الحلقة السابقة

أن أحد الأصدقاء أخبرني أنه لا يتسحر مطلقا

فكان الحديث بالأمس عن أمر النبي عليه الصلاة والسلام بالسحور

طيب هل الأمر بالسحور يقتصر على أن بالسحور بركة أم أن هناك أمرا أخر ؟

قال رسول الله صلى الله عليه وسلم :-

" فصل ما بين صيامنا و صيام أهل الكتاب أكلة السحر "
الراوي: عمرو بن العاص المحدث: الألباني - المصدر: صحيح الجامع - الصفحة أو الرقم: 4207
خلاصة حكم المحدث: صحيح

أى أن الفرق بين صيامنا وبين صيام أهل الكتاب هو السحور

فالسحور مع أهميته .. هو فرق بيننا وبين أهل الكتاب
وهو مخالفة لأهل الكتاب

فكما أمرنا بمخالفة أهل الكتاب

فنحرص على السحور وتكون من نوايانا أننا نخالف اليهود والنصارى

ومتخافوش خلاص بكره إن شاء الله حاجه تانية غير موضوع السحور

2 - غلط :-

إن شاء الله في هذا الجزء من الحلقات

ستفاجئون بكثير من الأحاديث التى نرددها ونعتقد أنها صحيحه ونرددها ونسمعها كثيرا

وهي غير صحيحة

طبعا في شهر رمضان .. كلنا بنصوم .. واكيد كلنا بنفطر

عند المغرب طبعا

طيب اول ما الأذان بيأذن في لمح البصر تلاقي الواحد فينا ماسك التمر أو ماسك الكوب وحيبدأ بقه

بس طبعا فيه دعاء بنقوله قبل منفطر

ايه هو الدعاء ده ؟؟

ااااه بنقول :-

" اللهم لك صمت وعلى رزقك أفطرت وعليك توكلت "

مش كده برضه ؟؟

اه .. بس الحديث ده .. ضعيف !!ا

ضعيف بجد ؟؟

ايوا ضعيف .. ومثبتش ان الرسول عليه الصلاة والسلام كان بيقول كده عند الإفطار

امال نقول ايه ؟؟ ايه الصح ؟؟

فكروا و ابحثوا وغدا إن شاء الله في الحلقة القادمة نعلم ايه الصح اللى نقوله عند الإفطار

3- قصة طريفة :-

من غير مقدمات خالص بقه المرة ديه

قال ابن الجوزي -رحمه الله- :

عن محمد الداري قال : كان عندنا رجل بدارا وكان فيه غفله ، فخرج من داراً ومعه عشرة أحمر - جمع حمار- ، فركب واحدا وعدّها ، فاذا هى تسعة ، فنزل وعدّها فإذا هى عشرة ، فركب واحدا وعدّها ، فاذا هى تسعة ، فنزل وعدّها فإذا هى عشرة ،فلا زال كذلك مراراً ، فقال : أنا أمشي وأربح حمارا خير من أن أركب ويذهب مني حمار ، فرأيتُه يمشي حتى كاد يتلف - كان حيموت من التعب - إلى أن بلغ قريته. !!ا

مش لاقى حاجه اقولها بصراحه

بس اللى أقدر أقوله انك لو شفت الراجل ده متسيبوش .. لانه مسلّي جدا

لكن المستفاد أننا كثيرا ما نفعل شئ خاطئ .. ولا ندري أننا نفعل الخطأ ويعدّى علينا واحنا مش واخدين بالنا اننا بنعمل حاجه غلط .. فخلي ليك صديق يصدقك .. يظهر لك أخطائك .. فالصديق مرآة صديقه .. ولو حد نبهك لغلط بتعمله .. فكر فيه .. يمكن فعلا انت بتعمل غلط وانت مش واخد بالك .. متقولش ايه اللى جاى يقول اى كلام ده ؟!؟

ازاى يقولى كده .. لا طبعا انا مش كده

لا فكر في النصيحة .. يمكن فعلا انت على غلط

مش يمكن تكون فعلا راكب الحمار وعمال تعد اللى قدامك وناسي اللى راكبه !!ا

بكده خلصت الحلقة الخامسة يارب متكونوش زهقتوا

وبكره إن شاء الله نلتقى في الحلقة السادسة إن شاء الله

وجزاكم الله خيراً
__________________

ابسط ما تساهم به نشر الحلقات ولو بالايميل

[ندعوك للتسجيل في المنتدى أو التعريف بنفسك لمعاينة هذه الصورة]

فعلا موضوع يستحق المتابعه وبشده

جعله الله فى موازين الحسنات

دموع تائبة كتب:: [ندعوك للتسجيل في المنتدى أو التعريف بنفسك لمعاينة هذه الصورة]

فعلا موضوع يستحق المتابعه وبشده

جعله الله فى موازين الحسنات

الشكر لله عز وجل

إنه لمن دواعي سرور أن يعجبك موضوع أعرضه

اللهم آآآآآآآآآآآآآمين

تسعدني متابعتك

ومع الحلقة رقم 6

من سلسلة

" صح وغلط وقصة طريفة "

1- صح :-

بالأمس تكلمنا في جزء " غلط " عن الحديث الضعيف الذي يقوله كثيييييييييير جدا من المسلمين عند الإفطار و يظنون أن هذا ثابت عن النبي صلى الله عليه وسلم

وهو غير ثابت بل هو حديث ضعيف

طيب إيه الصح اللى نقوله عند الإفطار ؟؟

إن من أصح الأحاديث في باب الأدعية عند الإفطار ولعله الحديث الوحيد الثابت في هذا الباب

هو حديث ابن عمر رضى الله عنهما قال كان رسول الله صلى الله عليه وسلم إذا أفطر قال :

" ذهب الظمأ و ابتلت العروق و ثبت الأجر إن شاء الله "
الراوي: عبدالله بن عمر المحدث: الألباني - المصدر: صحيح الجامع - الصفحة أو الرقم: 4678
خلاصة حكم المحدث: حسن

وهذا الحديث حسّنه كثير من أهل العلم

طيب هل يقال هذا الدعاء قبل الإفطار أم بعده ؟؟

بعض أهل العلم قال أن هذا الدعاء يُقال بعد الإفطار ولكن الأمر واسع إن شاء الله كما قال العلّامة عبد المحسن العباد :

( وهذا الذكر يقال قبل الإفطار أو بعده، والأمر في هذا واسع )

إذن نحرص على نصحح ما كنا نقوله عند الإفطار وبدل منقول :
( اللهم لك صمت وعلى رزقك أفطرت ..... ! )

نقول ما ثبت عن النبي عليه الصلاة والسلام :

" ذهب الظمأ و ابتلت العروق و ثبت الأجر إن شاء الله "

2 - غلط :-

كثير جدا لما حد نعرفه يُرزق بمولود .. أو حتى قبل أن يأتي المولود

تلاقى الناس عماله تسأله :

هاااااا .. حتسميه ايه ؟؟

على اسم جده ؟؟ ولا على اسم جدته ؟؟ ويقعد بقه يعدله كل الأقارب

يروح قايله:لا لا .. سيبك من الكلام ده

أنا بقه حسميه : محمود أو أحمد أو محمد أو حمدي أو حميد أو حمدان أو حمد أو حامد

ايييييييه ياعم كل ده ؟؟

لا لسه .. أو عبد العزيز أو عبد الله أو عبد الرحمن أو عبد الحميد أو .......

أصلي حتبع حديث الرسول عليه الصلاة والسلام ..

ايه بقى الحديث ده ؟؟

حديث :

( خير الأسماء ما عبّد وحمّد )

مممم .. عندك حق .. صدق رسول الله صلى الله عليه وسلم

ثانية واحده .. صدق رسول الله عليه الصلاة والسلام فيما قال طبعا

بس ده مش من كلام الرسول عليه الصلاة والسلام

الحديث ده : لا أصل له

يعنى اخترااااااااااااااع .. واحد شرب كوبايتين شاى وعمل دماغ وراح مألف الحديث ده

الحديث لا اصل له في كل كتب السنة

يبقى محدش ييجي بقه يقولك سمي كذا أو كذا علشان الرسول قال :

خير الأسماء ما عبد وحمد .. قله لاااا الرسول مقالش كده

لكن هناك من النصوص ما يدل على استحباب تسمية اسم : محمد

لحديث : " تسموا باسمي " رواه مسلم

و روى عن النبي استحباب تسمية عبد الله وعبد الرحمن للحديث الذي صححه الشيخ الألباني :

" خير الأسماء عبد الله وعبد الرحمن " لكن للأمانه الحديث ضعفه كثير من أهل العلم

3- قصة طريفة :-

ذكر ابن الجوزي -رحمه الله - :

دخل بعض المغفلين على رجل يعزيه بأخ له ، فقال : أعظم الله أجرك ورحم أخاك وأعانه على ما يرد عليه من مسألة يأجوج ومأجوج ، فضحك من حضر وقالوا له : ويحك ، أو يأجوج ومأجوج يسألان الناس؟ فقال : لعن الله إبليس ، أردت أن أقول هاروت وماروت !!!ا

جه يكحلها عماها

طبعا هو يقصد : هابيل وقابيل

أكيد منكر ونكير

كثير منا بيتفزلك .. يعنى ميبقاش عنده علم في حاجه بس ده مبيمنعوش انه يسكت وميفتيش .. لا كثير منا حتى وهو معندوش على فى مسألة ما يقعد يقول : بس أنا رأيي كذا وكذا .. أنا شايف كذا وكذا

يعنى ممكن تيجيى تسأل واحد في حكم حاجه في الدين مثلا

يستخسر يقولك معرفش .. الله أعلم

لا يروح قايل : بيتهيئلي يعنى أنه حلال لأنه عادي يعنى وأصل مفيش مانع ومش مقتنع ان فيها حاجه .... وهو أصلا ممكن يكون أول مرة في حياته يسمع عن الحاجه ديه

كثير بيقعد يتفزلك كده .. عايزين لو اتسألنا عن حاجه لو منعرفش نقول منعرفش مش عيب

قال بعض السلف :" لا أدري " نصف العلم

حاجه تانية نستفيدها .. متتكلمش الا باللى انت عارفه .. حاجه شاكك فيها لا تقلها

سواء في أمور الدين أو حتى الدنيا .. ممكن واحد جاي يسألك يقولك هو مصر الجديدة فين .. انت شاكك بقه مصر الجديده ديه هليوبوليس ولا جاردن سيتي

تروح شارحله طريق جاردن سيتى .. وسلملى على الدائري

ومنتكلمش الا باللى عارفينه ومتأكدين منه علشان منضحكش الناس علينا

ولو لقينا نفسنا غلطنا نعترف اننا منعرفش مش عييييييييييييب

بكده خلصت الحلقة السادسة يارب متكونوش زهقتوا

وبكره إن شاء الله نلتقى في الحلقة السابعة إن شاء الله

وجزاكم الله خيراً
___________________

ابسط ما تساهم به نشر الحلقات ولو بالايميل

ومع الحلقة رقم 7

من سلسلة

" صح وغلط وقصة طريفة "

1- صح :-

في هذا الشهر الكريم .. شهر رمضان

شهر القرآن .. ينبغي لنا ألا نترك القرآن وألا نقصّر في قراءة القرآن فالثواب كبير جدا

ففي حديث ابن مسعود رضى الله عنه

" من قرأ حرفا من كتاب الله فله به حسنة والحسنة بعشر أمثالها لا أقول الم حرف ولكن ألف حرف ولام حرف وميم حرف "
الراوي: عبدالله بن مسعود المحدث: الألباني - المصدر: صحيح الترغيب - الصفحة أو الرقم: 1416
خلاصة حكم المحدث: صحيح

الحديث صححه كثير من أهل العلم مرفوعا للنبي عليه الصلاة والسلام - أى من قول النبي عليه الصلاة والسلام -وبعض أهل العلم قالوا بأن الحديث موقوف على ابن مسعود رضى الله عنه - أى أنه من كلام ابن مسعود-

فنحرص على قراءة القرآن فبكل حرف نقرؤه حسنة .. فهذا ثواب عظيم جدا والله يضاعف لمن يشاء

فنتخيل أن أحد قرأ في اليوم جزءا .. فكم حرف في الجزء ؟؟

كثير جدااااا فبكل حرف إن شاء الله حسنة .. فإن شاء الله إن أحسنا القراءة وتُقبِّل منا كل حرف بحسنة

فهذا خير كبير ويكون إن شاء الله مرجّحا لميزان حسناتنا يوم القيامة ان شاء الله

ونحرص على التلاوة الصحيحة والقراءة المنضبطة بالأحكام
وأعلموا أن الله عزّ وجلّ قال :-

" الَّذِينَ آتَيْنَاهُمْ الْكِتَابَ يَتْلُونَهُ حَقَّ تِلَاوَتِهِ أُوْلَئِكَ يُؤْمِنُونَ بِهِ " 21 - البقرة

فنحرص على تلاوة القرآن حق تلاوته ونتعلم التلاوة الصحيحة

فنبدأ نشد في القراءة ونحاول نختم كذا مرة .. الأيام ديه فرصة والله .. فرصة متتعوضش

2 - غلط :-

بمناسبة قراءة القرآن في هذا الشهر .. وينبغى أن نحافظ على القراءة طول العام ولا نهجر القرآن

كثير منا يكون حيقرأ القرآن ويكون لسه بيتعلم مثلا فبيغلط ..
بس يكون بيتعلم مش بيغلط وسايب نفسه كده عمال يغلط

فييجي حد يسمعه .. يروح قايله مينفعش كده ايه الغلط ده .. لازم تقرا صح - طيب هو بيتعلم يعمل ايه طيب !!! إن شاء الله حيتعلم ويقرأ صح-

انت مسمعتش ان الرسول عليه الصلاة والسلام قال

" رب قارئ للقرآن والقرآن يلعنه "

أو واحد يكون بيقرأ كده بس تحس انه سرحان شوية .. برضه حد يجيله ويروح قايله نفس الحديث

سمعتوا الحديث ده قبل كده ؟؟

أهو الحديث ده مش من كلام النبي صلى الله عليه وسلم

ايه مش من كلام النبي فعلا !! ده تقريبا كلنا عارفينه ؟؟

اه مش من كلام النبي عليه الصلاة والسلام

الحديث ده ذكره الغزّالي في إحياء علوم الدين بدون سند .. من غير أى سند

فالحديث غير صحيح ولا يصح نسبته للرسول عليه الصلاة والسلام

فلنحذر من قول هذا الحديث ولو سمعناه من حد .. زي متفقنا نوضح بس برااااحه

وده مش معناه اننا نقرا القرآن بقه غلط ومش مشكلة .. لا طبعا لازم نتعلم ونقرأ صح .. ولما نقرأ القرآن نتدبره ونركز .. هذا كلام الله

3 - قصة طريفة :-

ذكر ابن الجوزي -رحمه الله- :-

عن عبد الرحمن بن داوود ، قال : لقى تاجر تاجرا فقال له : ما اسمك ولا تطول ؟ فقال : أبو عبد منزِّل القطر عليكم من السماء تنزيلا الذي يمسك السماء أن تقع على الأرض بإذنه ، فقال : مرحبا بك يا ثلث القرآن .

طبعا هو اسمه عبد الله او عبد الرحمن مثلا بكن هو حب يتفزلك

كثير جدا ممكن تسأل حد سؤال وممكن الجواب يكون في كلمتين .. ياخدك ويوديك وتروح وتيجى ويقعد يرغي لحد متنسى أصلا انت بتكلمه ليه ولا مين ده اصلا

و ممكن تكون ساعتها متضايق أو مزاجك مش قد كده فتبقى عايز اللى قدامك ينجز .. فيستفزك بكثر كلامه .. وفعلا تتخنق منه

وأيضا ممكن كثير جدا حد يسألنا عن حاجه ويبقى مخنوق او مستعجل أو وراه حاجه أو متضايق

نقعد بقه نرغي بدون لازمة .. نطول بدون داعي مع ان ممكن نرد في كلمتين

نخلي بالنا ان حتى لو اللى قدامنا مزاجه كويس لو جاوبته بكلمتين مش حيتضايق لكن لو قعدت ترغي ممكن يتضايق
فنحرص على الرد على الأسئلة بالمختصر المفيد وعلى قد السؤال

إن ما قل ودل خير مما كثر وألهى

مش حد ييجي يسالك ويكون رايح مسجد يصلي فيه تراويح مثلا والمسجد جنبك بشارع وهو مش عارف .. فيسألك :
لو سمحت جامع أمير المؤمنين فين ؟؟

تقوله بص حضرتك .. هات أول ودوس على البنزين وارفع من على الدبرياش وامشى براحه وبعدين انقل على التانى وبص يمينك حتلاقى كشك سيبك منه لأنه بيبيع سجاير ولو شافك بتبصله وانت راجل متدين يفتكر انك حتشرب سجاير فتفتن الناس ويفتكر ان بيعه للسجاير حلال رغم ان وزارة الصحة محذرة منها وبتقول ضار جدا بالصحة ... وووووو والتراويح تخلص وهو لسه مجابش أول ولا اتحرك من مكانه

لا لو حد سألنا نقول : بص حضرتك يمين فى ثاني شمال مثلا .. ولو مش متأكدين نقول معرفش حضرتك اسال حد تانى

منفتيييييييييييييييش

كده خلصت الحلقة السابعة يارب متكونوش زهقتوا

وبكره إن شاء الله نلتقى في الحلقة الثامنة إن شاء الله

وجزاكم الله خيراً
___________________

ابسط ما تساهم به نشر الحلقات ولو بالايميل
__________________________________

بارك الله فيكي ياأخت هبة الله

موضوع أكثر من رائع وجهد تشكري عليه

ولكن الجزاء الكبير عند الله ويارب يكون في ميزان حسناتك

م/أحمديونس كتب:: بارك الله فيكي ياأخت هبة الله

موضوع أكثر من رائع وجهد تشكري عليه

ولكن الجزاء الكبير عند الله ويارب يكون في ميزان حسناتك

وفيكم الله بارك

ومن الرائع تواجدك بالموضوع , الشكر لله عز وجل

اللهم آآآآآآآآآآآآآآآمين ولكم المثل وزياده

» خلق الجان وقصة الشيطان
» قصة طريفة
» قصة طريفة 2
» نصيحة طريفة
» سلسلة المفاتيح !!!

سلسلة ::*.*:: صح وغلط وقصة طريفة ::*.*::

سلسلة ::.:: صح وغلط وقصة طريفة ::.::